Një video që po bën xhiron e rrjeteve sociale ka rikthyer sytë e botës drejt çiftit presidencial francez. Në pamje, Brigitte Macron – 72 vjeç – shihet teksa i jep një shuplakë të lehtë bashkëshortit të saj, presidentit Emmanuel Macron – 47 vjeç. Edhe pse për disa ishte thjesht një moment i çuditshëm në publik, për të tjerë ishte një nxitje për të rikujtuar historinë e pazakontë të dashurisë së çiftit më të komentuar në politikën evropiane.
Historia e tyre nisi kur Brigitte ishte mësuesja e tij në një shkollë katolike në Amiens dhe Emmanueli vetëm 15 vjeç. Lidhja e tyre në atë kohë tronditi prindërit e tij, të cilët vendosën ta largonin djalin nga qyteti, duke e dërguar në një shkollë konvikti në Paris – me shpresën se ndjenjat e tij do të ndryshonin. Por nuk ndodhi kështu.
Ata mbajtën lidhjen për gati një dekadë, ndërsa Brigitte vazhdonte jetën familjare me tre fëmijët e saj dhe bashkëshortin e atëhershëm. Vetëm pasi fëmijët u rritën dhe ajo u divorcua në vitin 2006, çifti e bëri zyrtare marrëdhënien, duke u martuar një vit më pas.
Brigitte ka rrëfyer se vendimi për të ndjekur zemrën e saj nuk ka qenë i lehtë. “E dija që po lëndoja fëmijët e mi, dhe kjo është gjëja më e vështirë për mua,” ka thënë ajo për revistën Elle. “Por jeta ka momente kur duhet të zgjedhësh.”
Sot, ata janë bashkë si partnerë në jetë dhe në pushtet. Edhe pse sfidat nuk mungojnë, Brigitte tregon se përpiqen të mos flenë larg njëri-tjetrit dhe e përshkruan marrëdhënien si një lidhje të sinqertë, plot dinamika si çdo çift tjetër.
