Pasditen e sotme në rubrikën “Ka Një Mesazh Për Ty” është transmetuar një histori e jashtëzakonshme e cila shumë rrallë ndodh në ditët e sotme.
Erida është protagonistja kryesore e kësaj historie e cila me kalimin e kohës, pasi njohu mashkullin që i vodhi zemrën, ra në dashuri gjithashtu me profesionin e tij, i cili sot është pasioni i saj më i madh.
Ajo tregon se çdo gjë ka nisur më datën 7 Maj të vitit 2010 ku ajo u njoh në një lokal nate me Arbrin: “Jemi një çift që nga dita e parë nuk ja kemi prishur për asgjë njëri-tjetrit, jemi të dy kokëkrisur. Pas 20 ditësh që u njohëm vendosëm të bëjmë fejesën. Unë isha studente në master në vitin e parë, njëkohësisht sportiste dhe mësuese anglishteje. Bashkëshorti im është Dj Stone, ndërsa unë kampione e Shqipërisë në ping pong për pesë vite.”
Erida tregoi se duke parë bashkëshortin e saj të luante muzikë, papritur i lindi një dëshirë e madhe që ajo të bëhej DJ.
“Gjatë verës shkuam në Rodos, Greqi, të punonim si artistë dhe atje provova dhe miksoja disa këngë teksa isha edhe prezantuese. Pas 2 muajsh lidhje, erdhi celebrimi dhe në 1 Prill mësova se do të bëhesha nënë e një vajze, por askush nuk më besonte. Sot kam vajzën e madhe Beatris 7 vjeçe dhe djalin e vogël 1 vjeç, Rajan. Gjithmonë e më shumë më pëlqente të isha DJ dhe një mëngjes pas një darke ku unë miksova disa këngë më shkruan dhe më thotë a do të bëhesh DJ? Erdhi në shtëpi dhe nga ajo ditë fillova të luaj rregullisht çdo ditë derisa tani kam arritur dhe performoj në klubet e natës në kryeqytet”, tha Erida.
Por pse e ftoi Erida bashkëshortin e saj në rubrikën “Ka Një Mesazh Për Ty”?
Sado e çuditshme të tingëllojë, Erida e ka ftuar Arbrin për një sfidë bashkëshortore mes DJ.
Ajo rrëfeu se në fillimet e lidhjes së tyre e kishte lënë bashkëshortin e saj që ta mundte në një lojë ping-pongu, ndërkohë Arbri e mohon këtë fakt dhe thotë se ka qenë plotësisht e merituar si fitore.
Erida sot e sfidoi atë duke i thënë se do ta mundë në fushën e tij, mirëpo loja mes tyre u mbyll me një barazim. /tvklan.al
