Nëse ka diçka në sistemin e administratës në Shqipëri, të cilën e keni vështirë që ta “përtypni” është pikërisht burokracia. Të duhet të ikësh në disa institucione, të duhet mbi një vulë apo firmë, për të cilën pret në radhë të gjata, e gjitha kjo për një shkresë.
Të gjithë jemi ndjerë të nevrikosur apo të dëshpëruar nga ajo që përballemi në përditshmërinë tonë. Kështu ndihej edhe Korotkovi te tregimi “Djallëzorët” i shkrimtarit rus Bulgakov, të cilën nga e enjtja do ta shikoni si shfaqje teatrale më 9-12 nëntor.
Si asnjëherë më parë 8 regjisorë bëhen bashkë për të treguar atë që ndodhte në sistemin komunist rus. Grupi “Kolektiv38” i përbërë nga një regjisore shqiptare, Madi Selimi dhe shtatë italianë (Valentina Carbonara, Rolando Macrini, Elio Colassanto,Riccardo Mallus, Ashai Lombardo, Mirko Corradini, Silvia Zoffoli), u bashkuan për të sjell tregimin e parë të “Trilogjisë së heshtjes së kuqe”.
Në një intervistë për “Iconstyle.al”, regjisorja shqiptare, Madi Selimi, na njeh me disa nga detajet e shfaqjes:
“Djallëzorët” tregon për mekanizimin e burokracisë dhe të fillimit të një epoke të re siç është komunizmi në periudhën e Leninit. Flet për një punonjës administrate, të cilit i bëhet një padrejtësi, hiqet nga puna për një gabim të drejtorit dhe ai futet në këtë botë surreale. Sepse vetë autori na e përshkruan botën e komunizmit si një botë shumë groteske, ku ka personazhe që transformohen nga njerëz bëhen mace, shpendë, etj., për të thënë sesa e tmerrshme ishte ajo periudhë. Dhe në fund personazhi vendos të jetë i lirë nga ky sistem mbytës”.
Por si e gjeti këtë zgjidhje personazhi kryesor?
Të gjithë kemi këtë pyetje të cilën duam ta zbulojmë vetë teksa e shohim më 9 dhe 10 nëntor te “Teatri Eksperimental” dhe 11, 12 nëntor te “Teatri i Kukullave”.
Ndërsa mund t’iu duket kaq shumë e përjetuar situata që kalon Korotkovi, kjo është dhe arsyeja pse 8 regjisorët vendosën ta mbanin në vendin që e përjetoi komunizmin.
“Shfaqjen vendosëm pikërisht që të bëhej në Shqipëri, në Tiranë, sepse asnjë popull më mirë sesa ai i joni nuk e ka kaluar periudhën e komunizmit. Është mirë gjithashtu të jepet ky informacion historik për brezat e rinj, që nuk e kanë prekur. Ne kemi marrë spunto nga sistemi në Rusi e Bulkakovit dhe kemi futur elemente të komunizmit shqiptar. Është edhe shumë aktuale në administratat publike. Njerëz që nuk janë të kualifikuar për të qenë drejtues të një institucioni të caktuar dhe heqin njerëz që janë të pafajshëm”, shprehet regjisorja Selimi.
Teksa ndalemi te aktorët, protagonistja është një emër shumë i njohur dhe i dashur për ne. Marjana Kondi është në rolin e narratorit, e cila përfaqëson revolucionin e veshur me takat e kuqe.
Katër personazhet e tjerë, Ermela Ruri, Anderson Gurra, Arjon Mamaj, Ana Kuqo, u vjen radha që të jenë të gjithë nga një herë personazhi kryesor (Korotkovi). Siç shprehet edhe Madi Selimi: “Sepse të gjithë neve na ka ndodhur të jemi personazhi kryesor në jetën e përditshme”.
E veçanta e kësaj shfaqje është se nuk ka skenografi, pasi janë vetë aktorët të cilët bëjnë skenografinë. Në këtë mënyrë sipas regjisores nuk mbytet loja e aktorit.
Burimi: Iconstyle.al
