Autoriteti i Aviacionit Italian ka vendosur të pezullojë licencën e kompanisë ajrore “Fly Ernest”.
Kjo për shkak të ngatërresave të shumta dhe vonesave të fluturimeve në linjat Shqipëri-Itali dhe Shqipëri-Ukrainë.
Ky pezullim do të hyjë në fuqi më datën 13 janar të vitit 2020, ndaj Autoriteti i Aviacionit Civil Shqiptar i bën thirrje qytetarëve që kanë prerë bileta me këtë linjë ajrore që të konfirmojë statusin e fluturimit të tyre me kompaninë ose agjencinë e biletës para ditës së fluturimit, siç mund ta shihni në njoftimin e përkthyer nga “Tiranapost.al”.
Njoftimi zyrtar
“Nëpërmjet deklaratës për shtyp n. 96/2019 të Autoritetit Italian të Aviacionit Civil (ENAC), njoftohemi se ENAC ka nxjerrë aktin e pezullimit të licencës së kompanisë ajrore “Ernest”. Pezullimi do të hyjë në fuqi më 13 Janar 2020, me qëllim e vetëm që t’i jap kohë kompanisë për të informuar pasagjerët për anullimin e fluturimeve apo për t’i mbrojtur ata që e kanë prerë një biletë udhëtimi.
Sipas vendimit të ENAC, edhe pse licenca e kompanisë mbetet në fuqi deri më 13 janar 2020, duke marrë parasysh festat në Shqipëri dhe Ukrainë, “Ernest” nuk do mund të nxjerrë më bileta në shitje. ENAC gjithashtu vlerëson se lejimi i licencës deri në 13 Janar nuk rrezikon sigurinë në operim të kompanisë.Gjatë kësaj kohe, nëse transportuesi siguron elementët e garancisë të kërkuara nga Rregullorja (KE) nr. 1008/2008, që përmban rregulla të përbashkëta për ofrimin e shërbimeve ajrore në Komunitetin Evropian dhe këto elementë vlerësohen në mënyrë të favorshme nga ENAC, masa e pezullimit mund të revokohet.
Nga ana e tij, Autoriteti i Avicionit Civil Shqiptar ka vendosur menjëherë kontaktin me autoritetin italian, për të marrë më shumë informacion për situatën e krijuar dhe për planin e kompanisë për mbrojtjen e pasagjerëve që mund të preken.
AAC i bën apel të gjithë qytetarëve që mund të kenë prerë bileta me këtë kompani ajrore, që të konfirmojnë statusin e fluturimit të tyre me kompaninë ose agjencinë e biletës para ditës së fluturimit.”
