Hervin Çuli, Drejtori i Teatrit Kombëtar është revoltuar dhe ka reaguar mjaft ashpër ndaj aktorit të mirënjohur Mirush Kabashi.
Në emisionin “Studio e hapur” me Eni Vasilin, aktori ka folur për censurën e këtij institucioni të rëndësishëm për artin, si dhe ka shprehur keqardhjen për shembjen e tij.
“Natyrisht që ka censurë, ajo ka kaluar nga pushteti në teatër. Jemi më keq se në diktaturë. Problemi kryesor është ligj për teatrin”- është shprehur në emision Kabashi.
Pas kësaj deklarate ka qënë i menjëhershëm reagimi i Çulit, i cili e quajti aktorin mashtrues ordiner, që ka marrë rrogën kot për 15 vite në Teatrin Kombëtar.
“Hahaha! Zotëria “hani, pini dhe rrëmbeni” pasi “grabiti” për 15 vite rrogën në Teatrin Kombëtar ka filluar të recitojë patologjikisht mediave gjoja se i dhemb shpirti për godinën e Teatrit Kombëtar. Ky individ që mori rrogën për 15 vite dhe u ngjit në skenën e TK-së vetëm me një shfaqje, është objekt për librin e rekordeve Guines. 100 milion lekë (të vjetra) ka përfituar me statistikë zotëria që fuste kartën në bankomat pa u skuqur fare. Nëse ndonjë nga miqtë më gjen diku në Europë, Amerikë, Australi ose në Hënë apo në Mars një “grabitës” të tillë, ju lutem të më bëjë me dije. Ndërkohë individi “hani, pini dhe rrëmbeni” është edhe një mashtrues ordiner. Më akuzon sonte tek emisioni i Eni Vasilit si censor të programit artistik të institucionit. Por kaq gënjeshtar ordiner është saqë shembullin e shpik aty për aty, duke i’u marrë fjala si memec dhe ia vë në gojë regjisorit Altin Basha. Tmerr! Gënjen me zërin e tjetrit!” – shkruan Hervin Çili në statusin e tij në reagimin e tij.
