Donald Dervishi dhe Borsion Spaho janë dy mësues të cilët me shumë vullnet dhe punë, arritën të bëjnë realitet, ëndrrën e tyre më të madhe. Ata i dhuruan dhjetëra fëmijëve në zonën e Vëndresh Mal, në Skrapar mundësinë për dije, pasi ndërtuan nga e para një shkollë.
Dy mësuesit fituan rreth 2.5 milionë lekë të vjetra nga emisioni “100 milionë”, ndërsa arritën të grumbullonin edhe rreth 10 mijë dollarë, si dhe kompani të ndryshme dhe individë dhuruan materiale. Me të gjitha këto, ata vunë në jetë projektin për ndërtimin e shkollës.
Në emisionin “Ftesë në 5”, Donald Dervishi dhe Borsion Spaho rrëfyen se ka përfunduar ndërtimi i shkollës dhe se Donaldi është drejtori i saj. Tashmë fëmijët e fshatit të Skraparit kanë mundësi të ndjekin studimet në shkollë gjatë këtij viti shkollor.
“Edhe mësuesit e kolegët tanë në Shqipëri, duhet t’i shohin gjërat më ndryshe. Mësues nuk quhesh se ke marrë një diplomë, apo do marrësh rrogën në fund të muajit, por ke një mision më të gjerë, duhet të arrish që nxënësit t’i bësh dikushin në jetë”, u shpreh Donaldi Dervishi.
