Dy të miturit, Spridhon Kristofor dhe Kleoni Fezollari, që u nxorën nga uji dy ditë më parë në zonën e Artës nga një emigrant shqiptar, fatkeqësisht nuk ia dolën. Pas minutash të gjata nën ujë, trupat e tyre nuk reaguan më, duke hyrë në atë që mjekët e përkufizuan si vdekje klinike.
Në mes të dhimbjes së pamasë, prindërit e tyre, njëri shqiptar dhe tjetri grek, morën vendimin më të vështirë e njëkohësisht më fisnik: të dhurojnë organet e djemve të tyre. Një akt që do të mbajë gjallë kujtimin e tyre në trupat e fëmijëve të tjerë që presin një shans për të jetuar.
Shpëtimi i tyre nisi me heroizmin e Ledian Gogës, emigrantit shqiptar që nuk mendoi dy herë për t’u hedhur në ujë e për t’i nxjerrë në breg. Por betejën për jetën, djemtë e vegjël nuk arritën ta fitonin.
“Do t’ju kujtojmë përgjithmonë, ikët si heronj”, shkruan shokët e klasës së tyre në një letër lamtumire që po qarkullon në rrjetet sociale. Dhe me këtë vendim të prindërve, ata vërtet ikën si heronj – duke lënë pas dritë për të tjerë.
