Një incident i dyshuar me materiale të rrezikshme ka detyruar autoritetet të evakuuojnë Terminalin 4 në Aeroportin Heathrow të Londrës. Shërbimet e emergjencës janë të pranishme në vendngjarje dhe pasagjerëve u është kërkuar të shmangin udhëtimin drejt këtij terminali. Sipas një deklarate që është bërë për mediat, një zëdhënës i aeroportit bëri të ditur se regjistrimi dhe operacionet në Terminalin 4 janë mbyllur, ndërkohë që pasagjerët janë drejtuar për mbështetje në terminalet e tjera.
Brigada e Zjarrfikësve të Londrës konfirmoi se atje janë dërguar ekipe të specializuara për menaxhimin e materialeve të rrezikshme për të vlerësuar situatën. “Një pjesë e aeroportit është evakuuar si masë paraprake, ndërsa zjarrfikësit janë duke u përballur me incidentin dhe po kryejnë vlerësimin e vendit të ngjarjes” – tha një zëdhënës i brigadës.
Fotot e shpërndara në rrjetet sociale tregojnë praninë e shtuar të ambulancave dhe shërbimeve emergjente përpara Terminalit 4. Ndërkohë, National Rail njoftoi se trenat nuk po ndalojnë në këtë terminal si pasojë e ndërhyrjes së shërbimeve të urgjencës.
Aeroporti ka siguruar se të gjitha terminalet e tjera janë duke funksionuar normalisht dhe po vijon mbështetje për pasagjerët që janë në vend. Autoritetet pritet të japin informacion të mëtejshëm pasi të përfundojnë hetimet.
