Kryeministri Edi Rama është shprehur sot nga Vlora, se hapja e shkollave do të shoqërohet me rritje të infektimeve dhe kjo është e pashmangshme duke parë eksperiencën e vendeve të tjera.
Gjatë inspektimeve sot në shkollën “24 Maji”, e cila është rikonstruktuar, kreu i qeverisë u bëri thirrje arsimtarëve që të jenë striktë por të duruar me fëmijët, pasi respektimi i rregullave nuk bëhet duke bërtitur.
Rama tha se edhe pse fëmijët mund të jenë më pak të rrezikuar, ata janë transmetues të virusit në shtëpi, ndëj kërkoi kujdes maksimal veçanërisht nga prindërit.
Ai foli edhe për të birin Zaho, dhe faktin që nuk ja shpjegon dot se nuk duhet të takohet me shokun e tij në klasë.
“Na është dashur ta marrim këtë vendim të vështirë. Të gjitha shtete po e marrin. Është i vështirë sepse edhe pse thuhet dhe faktet thonë që fëmijët janë më pak të rrezikuar, nuk është e vërtetë për të gjithë. E dyta, fëmijët vetë mund të jenë më pak të rrezikuar, por janë transmetues.
Siç ka ndodhur në vende të tjera, do kemi prapë rritje të numrave. Por kostoja psikologjike e mos hapjes së shkollave është shumë e madhe. Dhe pasojat që mund të lerë janë shumë të mëdha. Midis të dyjave, në këtë zgjedhje rolin e posaçëm keni për të qenë sa më strikt.
Të jesh strikt, por i duruar. Nuk bëhet kjo me britma dhe rreshtore. Hajde shpjegoja Zahos pse nuk duhet të takohesh me shokun. Nga ana tjetër është shumë e rëndësishme për të punuar me prindërit. Duhet futur gjithë bota e fëmijëve në një kornizë. Është e nevojshme tu thuhet se është e përkohshme. Është një sfidë e madhe dhe e keni këtë barrë. Mësuesit duhet të punojnë shumë që të jenë të vetëdijshëm”, deklaroi Rama.
Ndërkohë që Maqedonia e Veriut apo Greqia kanë shtyrë afatin e hapjes së shkollave (lexo këtu), Shqipëria po tregohet e nxituar në këtë drejtim, që pritet të sjellë rritje të infektimeve, në një kohë që nuk kemi as kushtet për ta përballuar.
Situata me pandeminë duket shqetësuese në vendin tonë, ku në 24 orët e fundit, 122 persona janë konfirmuar pozitivë dhe 6 të tjerë kanë ndërruar jetë.
Kur Shqipëria ka këtë bilanc tani që jemi ende në fillim shtatori, çfarë pritet të ndodhë në muajit në vijim kur të hapen shkollat dhe si do e përballojmë këtë krizë shëndetësore? Vjeshta erdhi dhe parashikimet e ekspertëve flasin për një valë të dytë të virusit që do jetë më e fortë se e para.
/Iconstyle.al
