Nga sot do të kemi mundësinë që kafenë ta pimë brenda ambientit të lokalit, sipas vendimit më të fundit të qeverisë, për hapjen e ambienteve të brendshme të bareve, lokaleve dhe restoranteve, gjithnjë duke respektuar distancën.
Çdo kafene apo biznes, në hyrje duhet të vendosë higjienizues të duarve. Personi duhet të ketë maskë mbrojtëse. Klienti duhet të dezinfektojë duart në çdo hyrje dhe dalje të biznesit. Subjekti restorant nuk duhet të sigurojë vetë shërbim. Tavolinat duhet të jenë në një distancë prej 2 metra nga njëra-tjetra.
Por hapja e ambienteve të brendshme të bareve e restoranteve është quajtur gjysmake, duke qenë se pronarët e këtyre bizneseve kanë paguar prej muajsh qiranë e plotë, vetëm për të shfrytëzuar gjysmën e hapësirës.
Në një prononcim për “iconstyle.al, Enri Jahaj, kryetar i Shoqatës së Bareve dhe Restoranteve, theksoi se nëse shfrytëzon vetëm gjysmën e hapësirës së një ambienti të brendshëm të një lokali, i bie që të paguash vetëm atë gjysmë, por kjo nuk ka ndodhur pasi deri më sot qiratë nuk janë reduktuar dhe as tarifa e plotë e hapësirës publike që i paguhet bashkisë që nga fundi i korrikut (lexo këtu).
“Ne qiratë tona i paguajmë me m² dhe paguajmë si brenda dhe jashtë gjithashtu dhe për zënien e hapësirave publike që nga fundi i korrikut paguajmë dhe tarifën e plote në bashki. Tani me logjikë të thjeshtë, nëse shfrytëzon gjysmën ose me pak të hapësirës dhe aspak ambientet e brendshme, deri sot i bie dhe qiratë dhe taksat për hapësirë të reduktohen gjë që nuk ka ndodhur”.
Gjithashtu nga sot do të hapen edhe pishinat në ambiente të mbyllura, ku në secilën prej tyre do të matet temperatura e klientit para së të futet në pishinë.
Disa nga rregullat për pishinat:
Ajo që theksohet që në fillim të protokollit të sigurisë për pishinat e mbyllura është se evidentimi qoftë edhe të një rasti të vetëm në strukturat e tyre do të sjellë mbyllje të aktivitetit, pavarësisht hetimit epidemiologjik.
Asnjë klient me temperaturë 37.5 nuk do të lejohet të futet në pishinë. Subjekti duhet të afishojë listën e simptomave. Subjekti duhet të ketë në çdo moment higjienizues të duave, sapun lëng, letër të pastër për duart. Kapaciteti i maksimal i pishinës në ambient të mbyllur duhet të bazohet në zënien e hapësirës 3 metër katror për person. Në çdo rast të sigurohet ventilimi, ajrimi i vendit të pishinës 5 herë në ditë. Subjekti duhet të kryejë dezinfektim të ambientit, larje para hapjes, gjatë funksionimit të paktën 3 herë ditë dhe pas mbylljes. Peshqirët duhet të sillën nga vetë klienti dhe të përdoren vetëm nga një person, ndërsa maska është e detyrueshme si për stafin por edhe për klientin kur ai ndodhet rreth pishinës.
Në hyrjen në dhomës së zhveshjes duhet të sigurohet distanca 1.5 metër. Uji i pishinës duhet të pastrohet në mënyrë sistematike dhe të detyrueshme me sistem filtrimi si dhe të kryhet klorimi i pishinës në mënyrë sistematike.
Gjithashtu në pishinat e mbyllura duhet të evitohen grumbullimet e skuadrave dhe grupeve të notit, por në rast se aktiviteti i tyre duhet kryer atëherë duhet të merren parasysh korsitë alternative duke krijuar korsi me një drejtim.
Disa rregulla për lokalet dhe restorantet
Ndërsa sa i përket bareve dhe restoranteve, thuhet se do të krijohet një tunel kalimi për të mbërritur tek kasa dhe një tjetër për t’u larguar në mënyrë që klientët të mos kenë kontakt me njëri-tjetrin. Nëse personi shfaq simptoma ndërkohë që është duke punuar, duhet të njoftojë mjekun e familjes. Personat e punësuar duhet të kryejnë çdo ditë vetëvlerësimin personal, nëse kanë simptoma të COVID. Çdo punonjës që ka shenja të COVID nuk duhet të paraqitet në punë. Çdo kafene apo biznes, në hyrje të saj duhet të vendosë higjienizues të duarve. Personi duhet të ketë maskë mbrojtëse. Klienti duhet të dezinfektojë duart në çdo hyrje dhe dalje të biznesit. Subjekti restorant nuk duhet të sigurojë vetë shërbim. Tavolinat duhet të jenë në një distancë prej 2 metra nga njëra-tjetra.
