Pasi ministrat e BE-së pranuan hapjen e negociatave me Shqipërinë, Këshilli Europian ka vendosur t’i hapë ato me vendin tonë.
Ministria e Punëve të Jashtme e ka bërë të ditur këtë lajm, duke e quajtur këtë veprim një hap historik në rrugën europiane.
Ministria e Jashtme shprehet se vendi ynë tashmë ka një punë të madhe përpara për të përmbushur në kohë kërkesat në përputhje me pritshmëritë e procesit të anëtarësimit.
Pas bllokadës së Francës dhe Holandës, Shqipërisë dhe Maqedonisë së Veriut iu refuzua hapja e negociatave në muajin tetor.
Mirëpo, Komisioni Europian modifikoi kriteret e zgjerimit dhe liderët e BE-së bënë thirrje që dy vendeve t’i hapen negociatat para Samitit të Zagrebit, që do të zhvillohet në muajin maj.
