Efektivi i policisë të cilit iu vetëvra gruaja me armën e shërbimit, është arrestuar me akuzën e “shkaktimit të vetëvrasjes”.
47-vjeçarja Merita Hajdari i dha fund jetës paraditen e së hënës me pistoletën e bashkëshortit polic, në komisariatin e Durrësit. Sherif Hajdari thuhet se ka debatuar ashpër me bashkëshorten, e cila në kushte depresive është vrarë me armën e tij të shërbimit.
Sipas Policisë, ngjarja ka ndodhur rreth orës në lagjen Nr. 7 të qytetit të Durrësit, në orët e drekës. Burimet nga Policia bëjnë me dije se, në momentin e ngjarjes ka pasur edhe persona të tjerë në banesën e punonjësit të Policisë së Durrësit, Sherif Hajdari, por jo saktësisht në dhomën ku ndodhi vetëflijimi.
Mësohet se në banesën 3- katëshe të çiftit Hajdari, ndodhej bashkëshorti i saj, djali në moshë madhore dhe kunata (nusja e vëllait të Sherifit). Sipas dëshmisë së dhënë prej tyre, ata janë ndodhur në oborr apo në ambiente të tjera rreth shtëpisë kur kanë dëgjuar krismën e armës.
Menjëherë ata janë futur brenda dhe kanë gjetur gruan pa jetë dhe armën pranë saj. Sipas Policisë, nëna e dy djemve të rritur ka humbur jetën nga një plumb në kokë, ndërsa është përdorur arma e shërbimit të bashkëshortit të saj. Policia thotë se dyshimet janë për vetëvrasje, por pa dalë rezultati përfundimtar nuk përjashtohet as pista e një krimi në familje.
Burimi: Panorama
