Më 20 prill, Komiteti Teknik i Ekspertëve në Shqipëri konfirmoi masën e re lidhur me parandalimin e përhapjes së COVID-19 në vend, që përfshinte karantinën dy-javore për personat që hyjnë në Shqipëri nga dy shtetet fqinje, Greqia dhe Maqedonia e Veriut.
Drejtuesja e Komitetit Teknik të Ekspertëve, Mira Rakacolli, tha në konferencë se situata në Shqipëri paraqitej ndjeshëm drejt përmirësimit, por sipas saj, në rajon situata paraqitej ndryshe. Ndaj u kërkua që ky vendim për karantinën 14 ditore të qëndronte në fuqi deri më 3 maj.
Për t’u ndalur tek ky fakt, kthehemi më herët gjatë kohës së pandemisë kur situata në vendet fqinje si Italia, Greqia apo Maqedonia e Veriut ishte shumë herë më e rënduar dhe numri i infektimeve dhe vdekjeve shumë më i lartë sesa sot.
Asokohe, vendi ynë jo vetëm që nuk mbylli menjëherë fluturimet për të parandaluar rrezikun, por nuk vendosi asnjë lloj karantine për qytetarët që hynin në Shqipëri.
Pse pikërisht përpara zgjedhjeve?
Muajin e kaluar, fiks pesë ditë përpara zgjedhjeve, u mor ky vendim i papritur i karantinës dy-javore për Greqinë dhe Maqedoninë e Veriut.
Siç dihet, në këto vende jetojnë shqiptarë që do të ktheheshin në Shqipëri për të dhënë votën e tyre, por me masat e reja kundër Covid-19, ata e patën të pamundur të merrnin pjesë në votimet e zgjedhjeve 2021. Pse më herët vizitat me Greqinë apo Maqedoninë e Veriut nuk kërkonin karantinë?
Duket qartazi që ky vendim i papritur i Komitetit Teknik i Ekspertëve erdhi jo në interes të popullit shqiptar, por në interes të qeverisë tonë në kohë zgjedhjesh.
Në të dyja rastet, pasojat e këtyre masave i vuan populli. Jo vetëm që jo të gjithë kemi mundësinë të ushtrojmë të drejtën tonë kushtetuese, por gjithashtu na pengohen mundësitë e udhëtimit.
Greqia merr “hak”
Për të marrë “hak”, gjithashtu Greqia vendosi dje ndaj Shqipërisë një karantinë 14 ditore, me të njëjtat masa si vendi ynë.
Ministria e Mbrojtjes së Qytetarëve të Greqisë vendosi që kufizimet në kuadrin e masave për parandalimin e përhapjes së Covid-19 do të jenë në fuqi deri më 14 maj.
Masat:
Kufiri mes Greqisë dhe Shqipërisë do vazhdoj të konsiderohet i mbyllur, dhe si pasojë nuk lejohet asnjë lidhje me linja taktike qoftë tokësore qoftë detare. Autobusët , mini van, makina me targa shqiptare dhe anije e kanë të ndaluar të hyjnë në Greqi.
Ndalohet hyrja në Greqi e qytetarëve shqiptar që duan të vijnë në Greqi për arsye turistike apo vizite. Ndalohen personat me pasaportë shqiptare, apo me 90 ditorëshin. Në Greqi lejohet të hyjnë vetëm personat që kanë leje qëndrimi ose nënshtetësi greke.
Për të gjithë personat që do hyjnë në Greqi, pavarësisht nënshtetësisë apo mjetit që udhëtojnë (avion, autobus , makine etj) duhet të plotësojnë 24-48 orë përpara mbërritjes në Greqi, Formularin PLF.
Për të gjithë personat që do hyjnë në Greqi, pavarësisht nënshtetësisë apo mjetit që udhëtojnë është e nevojshme të paraqesin Test negativ RT-PCR që duhet të jetë bërë deri në 72 orë përpara nisjes për në Greqi.
Për të gjithë personat që do hyjnë në Greqi nga Shqipëria pavarësisht nënshtetësisë apo mjetit që udhëtojnë duhet të bëjnë karantinë 14 ditore në shtëpinë e tyre.
Pikat kufitare do punojnë çdo ditë nga ora 7.00 deri në orën 19.00, nga Pika kufitare e Kakavijës do lejohet të kalojnë deri ne 400 veta. Kapshtica do jetë e mbyllur.
Të gjithë pasagjerët që do lëvizin jashtë Greqisë duhet të plotësojnë dhe PLF 24 orë përpara udhëtimit.
