Gregor Rama, djali i kryeministrit Edi Rama, ka zgjedhur ta jetojë jetën e tij larg zhurmës mediatike dhe asaj politike, e për këtë arsye janë të rralla intervistat me të. Mirëpo, pasi hapi ekspozitën e tij të parë me titull “Fidem”, Gregu zbuloi më shumë për jetën e tij në një intervistë për emisionin “7pa5” në “Vizion Plus”.
Ai foli për herë të parë për marredhenien e tij me vëllanë e vogël, madje shprehet se Zaho është pika e dobët në jetën e tij.
“Zahon, e kam pikë të dobët! Është një fat i madh që ai erdhi në jetë. Zaho, s’ka ardhur akoma pasi ishte bashkë me babin në Amerikë. Kur të vije, do ta marr me vete do t’i mbyll dyert edhe dua që ai ta shikojë këtë ekspozitë vetëm për vete. Ai është një djalë shumë inteligjentë. Madje çdo ditë që kalon ai duket se bëhet më inteligjent. Është shumë i vëmendshëm, i dashur, shumë i qetë. Tani nuk dua të ndikohem nga marrëdhënia ime apo dashuria ime për atë, por mua më duket një nga djemtë më inteligjent për moshën që ka. Mbase edhe ngaqë e dua shumë.” – tregoi Greg Rama.
Gjatë intervistës, djali i kryeministrit nuk la pa përmendur se ishte e ëma e tij Matilda Makoçi, ajo që e nxiti në rrugën e artit. Aktorja e famshme shqiptare kishte ngulur këmbë gjatë gjithë fëmijërinë e tij, se Gregu do të bëhej artist.
“Mami është njeriu që dua më shumë në jetë! Mami është shumë paqësore dhe shumë motivuese. Madje ka qenë ajo që në fillim, kur unë kam qenë i vogël, kur isha fëmijë 2 vjeç, ajo u pati thënë njerëzve që Gregu do të bëhet artist. Ndërkohë që unë u rrita, unë nuk e kisha fare qëllim që të merresha me art me thënë të drejtën. Por pastaj si duket, ndjeva adrenalinën të atillë aq sa nisa të merrem me këtë punë.” – përfundoi djali i kryeministrit shqiptar, Gregor Rama.
