Në ndeshjen e mbremjes se sotme, të Grupit B ndërmjet Kosovës dhe Zvicrës në stadiumin “Fadil Vokrri”, kapiteni i përfaqësueses zvicerane, Granit Xhaka, është përballur me reagime nga tifozët vendas sa herë ka prekur topin. Shkak për këtë duket se janë deklaratat e tij të mëparshme lidhur me dy yjet e Kosovës, Albian Hajdari dhe Leon Avdullahu, të cilët nuk u grumbulluan për këtë takim.
Xhaka kishte përmendur se dy lojtarët nuk janë të gatshëm për t’u aktivizuar ndaj Zvicrës dhe kishte përdorur shembullin e Ardon Jasharit, duke thënë se ai ka një përvojë më të madhe dhe ka luajtur më shumë ndeshje.
Megjithatë, tifozët kosovarë duket se nuk e kanë pritur mirë këtë koment, dhe sot çdo prekje e Xhakës është shoqëruar me fishkëllime dhe brohoritje kundër kapitenit zviceran. Situata ka tërhequr vëmendjen e mediave, duke e kthyer deklaratën e tij në një moment tensioni brenda stadiumit.
Kosova, megjithëse kërkon të përballet me Zvicrën me seriozitet dhe të japë maksimumin në fushë, ka treguar se edhe deklaratat jashtë saj mund të ndikojnë në atmosferën e ndeshjes, duke bërë që tifozët të reagojnë fuqishëm ndaj lojtarëve kundërshtarë.
Kujtojme se Kosova e ka siguruar play-offin e Botërorit, teksa me një fitore prej 6-0 sonte mund të shkojë direkt në ShBA, Kanada dhe Meksikë.
