Forcat e policisë u vonuan të kapnin grabitësit që vodhën 10 milionë euro në Rinas, pasi stafi i sigurisë së aeroportit nuk njoftoi në kohë kur pa grabitësit nga kamerat dhe s’i hapi derën policisë.
Stafi i koncesionarit “TIA” dhe i shoqërisë “ICTS Albania” që është ngarkuar për të siguruar rendin dhe qetësinë e aeroportit “Nënë Tereza”, rezulton të mos ketë bashkëpunuar në kohë më Policinë e Shtetit.
Ata nuk kanë dhënë në kohë alarmin, duke mos raportuar situatën e pakëndshme, që po zhvillohej tek njëra nga dyert e emergjencës, nga e cila futesh në pistën e avionëve.
Tropojani Admir Murataj së bashku me tre bashkëpunëtorët e tij, janë filmuar duke tërhequr zvarrë me furgon barrierën e betonit, që bllokonte kalimin.
“Shqiptarja.com” mëson se një patrullë e Forcave të Ndërhyrjes së Shpejtë ka ndërhyrë menjëherë sapo ka marrë njoftimin nga “ICTS Albania” dhe komisariati i Rinasit, por është penguar nga vetë stafi i “ICTS Albania”, pasi dera ku është kërkuar të futej policia, nuk hapej.
Gjithashtu mësohet se Admir Murataj, ka qëndruar vetë në furgon me qëllim që t’i vinte zjarrin dhe për të mbajtur sa më larg policinë, ka vijuar të qëllojë me armë drejt efektivave.
Por edhe këta të fundit i janë kundërpërgjigjur me armë, duke e goditur me një plumb në kokë, çka solli vdekjen e menjëhershme të Admir Murataj.
/Shqiptarja
