Familjarët e 13-vjeçares që humbi jetën në gjumë pasi një zjarr përfshiu barakat e familjes së saj në Shkodër, ka treguar se si ndodhi ngjarja.
Familjarët shprehen se zjarri dyshohet se ka rënë nga soba me dru, të cilën e ka ndezur gjyshja e të miturës dhe më pas ka dalë jashtë.
Vetëm pasi kanë vënë re mungesën e vajzës, familjarët kanë nisur kërkimet dhe pastaj e kanë gjetur në një prej barakave.
Një i afërm i 13-vjeçares ka rrëfyer se vajza ka qenë duke fjetur gjumë, ndërsa ka qenë gjyshja e saj që ka ndezur zjarrin që më pas përfshiu të gjitha barakat.
Sipas familjarëve viktima kishte probleme mendore.
“E kemi pas te Shtëpia e Fëmijës, e kemi pas edhe në Tiranë. Po shkuam e morëm para vitit të ri që të festonte me familjen. Ajo ka pas probleme mendore, ka qenë gjyshja e vet që ka ndezur zjarrin në barake. Edhe kjo ka qenë në gjumë. Në momentin që është ndezur zjarri ka, shkuar në banjë, kur ka dal ka pa flakën. Vajza ka qenë në gjumë. Unë i kam njerëzit e gruas”, tha i afërmi i vajzës.
“I vëllai ishte tu pi kafen e mëngjesit jashtë. Kemi pas me probleme gocën. Ka pas probleme me veshin shumë keq. E kemi vizituar në Shkodër, pas kësaj e çuam edhe atje tek qendra ku rrinte goca me fol me ta për problemin. Ndodhi kështu si ndodhi nuk e di tani”, shtoi ai.
