Ndërsa caktoi masën e sigurisë arrest me burg ndaj tre të dyshuarve për vrasjen e Liridona Ademajt, Gjykata e Prishtinës thotë në vendimin e saj se Naim Murseli, bashkëshorti i të ndjerës ia ka siguruar vetë armën e zjarrit të llojit pistoletë Granit Pllavës dhe të dy së bashku inskenuan grabitjen.
Në vendim thuhet se mbrëmjen e 29 nëntorit rreth orës 20:25 minuta, në fshatin Bernicë, Komuna e Prishtinës, përpara automjetit të çiftit ka dalë Pllava me armë në dorë dhe i maskuar.
Sipas marrëveshjes paraprake i pandehuri Naim Murseli me fëmijët kishin dalë nga vetura dhe ishin larguar nga vendi i ngjarjes gjoja për të ikur, ndërsa në veturë kishte mbetur viktima, e cila është qëlluar nga afër me një plumb në qafë, plagë e cila ka qenë vdekjeprurëse për të. E gjithë marrëveshja është bërë për një shumë prej 30 mijë eurosh.
