Shfuqizohet Bordi i Transparencës i cili nuk e ushtroi kurrë funksionin për të cilin u krijua që në fillim. Ditën e sotme, Gjykata Kushtetuese ka pranuar pjesërisht kërkesën e Partisë Demokratike duke shfuqizuar Bordin, i cili u vendos pas nisjes së konfliktit të armatosur në Ukrainë vitin e kaluar, duke sjellë edhe shtrenjtimin e çmimit të karburanteve në vend.
Bordi i cili nuk reflektonte asnjëherë çmimet në bursë u vendos të shkrihej tashmë, kur Shqipëria është në fillim të fushatës zgjedhore.
VENDIMI:
Pranimin pjesërisht të kërkesës. Shfuqizimin e nenit 21/10, pika 2, fjalia e dytë, të ligjit nr. 39/2022 “Për miratimin e aktit normativ nr. 5, datë 12.03.2022 “Për disa shtesa në ligjin nr. 8450, datë 24.02.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, të ndryshuar”, si të papajtueshëm me Kushtetutën e Republikës së Shqipërisë. Ky vendim është përfundimtar dhe hyn në fuqi ditën e botimit në Fletoren Zyrtare.
Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar dhe nga Rregullorja për Procedurat Gjyqësore të Gjykatës Kushtetuese.
