Gjykata e Apelit ka lënë në arrest me burg Ermes Hoxhallin, i hetuar për mashtrim kompjuterik. Seanca u monitorua nga perfaqësues të ambasadës amerikane.
Qindra studentë, mësues dhe zyrtarë arsimorë në të gjithë Shqipërinë morën pjesë në këto programe mashtruese.
I arrestuari Ermes Hoxhalli u mor në pyetje nga Prokuroria e Tiranës, ku edhe deponoi se ishte thjesht një mik i “Klea Ramës”, profili i vajzës që e sajoi si “mbesën” e kryeministrit, por të gjitha të dhënat e gjetura në telefonat dhe në laptopin e tij, treguan të kundërtën.
Në pajisjet e tij kompjuterike është gjetur fotoja e këngëtares ameriakane, Gracie Abrams, por edhe logo të institucioneve që përdoreshin për certifikatat që shpërndante përmes projektit “Let’s talk about US’. (lexo këtu)
Ermes Hoxhalli pretendon se ka komunikuar për herë të parë me “Klean” në vitin 2021, pas një projekti që po zhvillohej në gjimnazin e Bilishtit. Më pas, pretendon se kontaktet i kishin vendosur në vitin 2023, pasi kishte menduar se “Klea” kishte kontakte me qeverinë dhe ndaj kishte vendosur që të vazhdonte bisedën me të. Madje për ta bindur për lidhjet që kishte, 20-vjeçari pretendoi se Klea i kishte treguar edhe një video ku ministrja për Fëmijët dhe Rininë, Bora Muzhaqi e kishte uruar për ditëlindje. Shpjegimin se përse në telefonat e tij kishte programe për bashkim fotosh, formate certifikatash, logo të Departamentit të Shtetit, të Kryeministrisë dhe Ministrisë së Arsimit, Hoxholli e dha para prokurorit të çështjes, por nuk bindi. Sipas tij, “Klea” e angazhonte për të përgatitur grafikisht certifikatat që shpërndaheshin në kuadër të projektit “Let’s talk about Us 2023-2024”.
