Përdorimi i photoshop-it në mënyrë të ekzagjeruar është bërë shqetësues për botën mbarë dhe në rrjet po serviren imazhe jo-reale që dëmtojnë rëndë psikologjinë e njerëzve!
Të shumtë janë personazhet VIP që nën presionin për të qenë “perfekt”, modifikojnë fotot e tyre dhe u paraqiten fansave si dikush që s’janë, njerëz pa asnjë defekt.
Deputeti Dr Luke Evans ka hartuar një ligj të ri që është ende në përpunim e sipër, i cili detyron personat e famshëm të tregojnë se cilat imazhe janë modifikuar në mënyrë dixhitale dhe të gjobiten për përdorimin e tij.
Dr Evans, një anëtar i Komitetit të Shëndetit dhe Kujdesit Social, tha që fotot e modifikuara në mediat sociale po ‘nxisnin një krizë të shëndetit mendor’. Ato po shqetësojnë kryesisht fëmijët, që po përballen me një realitet të rremë dhe po i nxisin të mendojnë e të sillen ndryshe në shoqëri.
Personazhe të njohur në Britani që janë akuzuar vazhdimisht për photoshop janë Lauren Gooder apo Khloe Kardashian, të cilat shpesh kanë shfaqur në rrjete sociale një imazh të deformuar të tyrin.
Fansat e kanë vënë re prej kohësh photoshop-in, por duket se VIP-at s’mund t’i ndalojë asgjë për të përdorur photoshop-in, veç ligjit të ri që mund të miratohet së shpejti.
Mesa duket, do të shohim më shumë foto origjinale të personazheve të njohur, të cilët ashtu si e gjithë bota, kanë imperfeksionet e tyre.
Po nëse ky ligj do të miratohej në Shqipëri, ç’mund të ndodhte vallë?
Një pjesë e madhe e personazheve të Showbiz-it e kanë bërë photoshop-in pjesë të jetës së tyre dhe faqe të ndryshme në Instagram kanë nxjerrë herë pas here “të palarat” e VIP-ave, të cilat vërehen me sy të lirë edhe nga vetë fansat.
Jo rrallë jemi ndeshur me akuza ndaj personazheve të njohur për përdorimin e photoshop-it, i cili është kthyer në një “sëmundje” edhe për shoqërinë shqiptare.
E mendoni një Shqipëri pa photoshop? Sa persona do të kishin guxim të publikonin një foto të paprekur dhe t’i tregonin botës fytyrën e trupin e tyre të vërtetë? A duhet t’i ndëshkojmë VIP-at “falsë”?
