Apple ka prezantuar zyrtarisht linjën më të re të iPhone-ve e cila përbëhet nga 4 pajisje: iPhone 14, iPhone 14 Plus, iPhone 14 Pro dhe iPhone 14 Pro Max. risia e këtij viti është iPhone 14 Plus, i cili ka zëvëndësuar versionin mini, i cili nuk rezultoi shumë i suksesshëm për kompaninë.
Më poshtë do të njihemi me specifikat kryesore të këtyre smartphone-ve.
iPhone 14 dhe 14 Plus
iPhone 14 do të jetë si zakonisht pajisja hyrëse në këtë seri. Ajo vjen me një dizajn shumë të ngjashëm me paraardhësin, ekran 6.1 inç, dhe për fat të keq me proçesorin që u përdor në gjeneratën e kaluar të iPhone-ve, A15 Bionic. Ky iPhone do të kushtojë $799.
Nga ana tjetër iPhone 14 Plus vjen me një ekran më të madh prej 6.7 inç dhe për shkak të kësaj diference në madhësi ofron gjithashtu dhe një bateri që zgjat akoma më shumë se versioni bazë. Dhe ky model do të përdorë proçesorin A15 dhe do të kushtojë $899.
Të përbashkëtat në këto modele jo Pro janë të shumëta. Për sa i përket kamerave, ultrawide është përmirësuar me një sensor të ri kryesor 12MP që ka një përmirësim rreth 49% në shkrepjen e fotografive në ambiente me ndriçim të ulët. Gjithashtu ka një rifreskim në kameran selfie 12MP true Depth me proçesim imazhi Deep Fusion.
Gjithashtu të dy smartphone-t do të vijnë pa një hapësirë për kartat SIM, dhe do të lejojnë përdorimin vetëm atë eSIM.
iPhone 14 Pro dhe 14 Pro Max
Kishte shumë raportime gjatë këtij viti se pajisjet e reja Pro nga Apple do të kishin një rritje në çmim për shkak të komponentëve të rinj që do të përdoren në këto pajisje, mirëpo gjatë eventit u tregua se çmimet do të mbeteshin të njejta me pajisjet paraardhëse: $999 për versionin Pro dhe $1,099 për versionin Pro Max.
Ndryshimi i parë që mund të vëmë re në këto pajisje është në pjesën e ekranit ProMotion 120Hz. Madhësitë do të jenë të njejta, 6.1” dhe 6.7”, por notch-i do të jetë i ri. Tashmë ai do të zëvëndësohet nga një prerje e re ku janë vendosur të gjithë komponentët e Face ID së bashku me kameran selfie.
Me ndryshimin e notch-it, do të ndryshojnë gjithashtu animacionet e shfaqjes së njoftimeve, që quhen “Dynamic Island”, duke lëvizur rreth kësaj prerje të re. Mund të shikoni në GIF e mëposhtëm se si ky shërbim do të funksionojë.
iPhone 14 Pro dhe Pro Max do të vijnë këtë vit dhe me always-on display, një shërbim i shumëkërkuar nga përdoruesit (që ekziston prej vitesh në Android). Për të fuqizuar pajisjen do të përdoret proçesori i ri A16 Bionic, i cili është fokusuar në efiçiencën e energjisë duke përdorur 20% më pak energji.
Gjithashtu për herë të parë Apple po largohet nga sensorët 12MP për të përdorur ato 48MP. Kjo gjë do të sjellë përmirësime në fotografimin në ambiente me pak dritë dhe në kualitetin e përgjithshëm të fotografive. Kamera ultrawide sjell përmirësime 3x në fotografitë me pak ndriçim dhe në modalitetin macro të fotografisë.
/geekroom.al
