Pas propozimit madhështor në arenën e Veronës dhe lindjes së vogëlushit Leo, Chiara Ferragni dhe Fedez janë gati të kurorëzojnë dashurinë e tyre në martesë, në ceremoninë më të komentuar të vitit që pritet të mbahet me 1 shtator në Itali.
Vetëm pak ditë më parë, Chiara dhe Fedez na prezantuan me ftesën e dasmës, që dukej sikur ishte shkëputur nga një libër përrallash.
Mirëpo sot, çifti më i famshëm i “Instagramit” na bënë të ditur vendimin e tyre në lidhje me dhuratat për ditën e dasmës dhe nuk mund ta fshehim dot që na emocionuan. Chiara dhe Fedez kanë vendosur të mos kërkojnë asnjë dhuratë nga të ftuarit, por të kontribuojnë për një kauzë të mirë.
“Ne nuk duam asnjë dhuratë nga të ftuarit, por u kemi kërkuar të dhurojnë për një kauzë që do të përzgjedhim. Ende nuk e kemi vendosur kauzën e për këtë arsye kërkojmë ndihmën e fansave: na shkruani në email tek @theferragnez.com dhe na prezantoni me një rast të një personi që keni pranë dhe ka nevojë për ndihmë dhe ne do t’i vijmë pranë” – shkruante Chiara përkrah postimit.
Me të vërtetë një gjest për t’u duartrokitur nga çifti më i famshëm i “Instagramit”, që na vërtetuan se kanë një zemër flori.
