Ekonomistët gjermanë po paralajmërojnë se tendenca në rritje e gjermanëve për të kursyer më shumë para se sa është e nevojshme mund të ketë pasoja negative për ekonominë e vendit. Sipas një sondazhi të YouGov, 75% e qytetarëve besojnë se tani është momenti i duhur për të kursyer, pavarësisht rritjes reale të pagave. Ekspertët e lidhin këtë sjellje me ndikimin e inflacionit të viteve të fundit dhe pasiguritë që mbetën pas pandemisë.
Katharina Gangl, drejtoreshë në Institutin e Nurembergut për Vendime Tregu (NIM), shpjegon se ulja e konsumit reflektohet menjëherë në ekonomi, duke prekur tregtinë, vendet e punës dhe të ardhurat nga taksat. Madje, ajo sugjeron që qeveria të shqyrtojë idenë e vendosjes së një takse simbolike mbi llogaritë e kursimit, jo për të mbledhur të ardhura, por për t’i sinjalizuar qytetarët se mbajtja e shumave të mëdha në banka nuk është gjithmonë zgjedhja më e mirë.
Ndërkohë, ekonomisti danez Erik Nielsen thotë se pesimizmi gjerman është i ekzagjeruar. Sipas tij, Gjermania mbetet një nga ekonomitë më të qëndrueshme globalisht, sidomos në krahasim me SHBA-në dhe Kinën, ku trazirat ekonomike e politike janë më të mëdha. Ai thekson se pavarësisht hendekut të të ardhurave për frymë mes SHBA-së dhe Gjermanisë, cilësia e jetës në vendin europian është më e lartë, veçanërisht sa i përket shëndetësisë dhe jetëgjatësisë.
Nielsen parashikon se politikat e reja të qeverisë, përfshirë rritjen e investimeve në infrastrukturë dhe mbrojtje, mund të sjellin një rimëkëmbje të fortë ekonomike deri në vitin 2027, duke i bërë thirrje gjermanëve të ruajnë qetësinë dhe durimin.
