Genta Gjalpi, e cila njihet si Genta e “Big Brother” ishte e ftuar dje në studion e emisionit “Rudina”, ku foli për eksperiencën e saj në “reality show”, por edhe për jetën e re pas tij.
Në moshën 19 vjeçare Genta u bë pjesë e “Big Brother” duke sfiduar një mentalitet të ngurtë të shqiptarëve për origjinën e saj dhe jetën që ajo kishte zgjedhur të bënte. Fama që i dha ky “reality show” e bënte të ndjehej mirë Gentën, por në të njëjtën kohë i shkaktonte edhe emocione negative.
“Isha e vogël, vetëm 19 vjeç dhe mendoja se mund të bëja gjithçka. U bënë rreth 6-7 vite nga koha kur kam qenë në realit show dhe mund të them se ajo eksperiencë më ka ndryshuar jetën”, u shpreh ish-banorja e “BB”.
Pikërisht emocionet negative që i falte fama e bënë Gentën që të merrte vendimin për tu tërhequr nga vëmendja mediatike. Ajo shpreh keqardhje për të gjitha komente negative që vijnë në adresë të saj.
“Jam tërhequr nga jeta publike, sepse nuk jam ndjerë rehat. Shumica e komenteve, për mua janë negative dhe nuk arrij ta shpjegoj nga vjen kjo… Lakohem shumë dhe më vjen habi sepse ata që komentojnë “çfarë është kjo, nga vjen kjo”, janë ata që merren më shumë me mua. Ndoshta jam ndër njerëzit që jam lënduar më shumë, edhe nga vij, ‘kush është kjo’”, – tha Genta.
Vetëm pak kohë më parë në rrjetet sociale u bë viral lajmi se Genta Gjalpi po shijon një romancë me ish-futbollistin e Partizanit Mustafa Agastra.
Por ajo tha se Agastra është kushëri i largët i saj dhe se fotoja që të dy kanë publikuar është shkrepur në një spa ku ata kanë qenë me shoqërinë e tyre.
“Ne ishim në një spa dhe nuk ishim vetëm ne, por edhe shoqëria jonë. Faktikisht unë jam edhe kushërirë e largët e tij dhe kemi qenë edhe komshinj në të njëjtën lagje. Tani jemi shokë shumë të mirë. Por gjërat ndodhin, ai është simpatik dhe unë simpatike dhe njerëzit aludojnë”, tha Genta
Aktualisht, ish-banorja e “Big Brother” jeton dhe punon në Tiranë në një kompani private në departamentin e marketingu.
“Aktualisht merrem me diçka që nuk ka lidhje me televizionin, kam dashur vetë të tërhiqem, sepse nuk kam dashur të jem publike.”- tha Genta ndër të tjera.
