Gazetarja Erisa Zykaj ishte e ftuar dje në emisionin “Rudina”, ku rrëfeu jetën e saj, vështirësitë dhe gjetjen e dashurisë së saj.
Ajo prej 17 vjetësh është zhvendosur në Bruksel ku punon si gazetare dhe reportere e mediave më prestigjioze ndërkombëtare. Që në moshë të vogël ajo kishte ëndërruar gjithmonë të bëhej aktore, ndoshta si shumë moshatare të saj, por veten si gazetare as e kishte ëndërruar, as e kishte imagjinuar.
Gazetarja e Brukselit për Abc News dhe Tv Klan ndau me publikun një pjesë të jetës private që e lidhi me Brukselin dhe vendosi fatin e saj atje. Ka qenë pikërisht Zako, bashkëshorti i saj prej 11 vjetësh, i cili e ka lidhur përfundimisht me shtëpinë e Bashkimit Europian.
Zako, bashkëshorti i Erisës, është një spanjoll i jugut, i lindur nga dy prindër me raca të ndryshme.
“Këto mikset janë të veçanta”: thotë Erisa me të qeshur.
Por si është njohur çifti? Siç ndodh në kësi rastesh, për të ishte dita më e papërshtatshme që mund të kishte pasur ndonjëherë.
“E gjeta aty ku nuk e imagjinoja fare. Unë isha nisur në kursin e holandishtes. Jo vetëm që nuk më dukej vetja e bukur atë ditë, por isha gati-gati e neglizhuar. Sapo hapa derën, hyra dhe thashë “Bonjour”. Ai u fokusua vetëm te shkëlqimi i syve. Unë e mora vesh vetëm pas 5 ditësh”: tregon Erisa.
Zako është regjisor në profesion. Ata nuk kanë bërë ceremoni martese, po në vend të saj, kanë zgjedhur që të udhëtojnë shumë nëpër botë, si dhe të bëjnë shumë dokumentarë dhe bashkëpunime të tjera.
“Jemi shumë aventurierë. Në vend që të harxhojmë para me dasma e me gjithë fisin, preferojmë të bëjmë filma, të udhëtojmë dhe projekte të tjera tonat.”: rrëfeu Erisa.
