Gazetarja e njohur e “BBC”, Rachael Bland prej gati një viti është duke luftuar me sëmundjen e kancerit dhe së fundmi është mësuar se sëmundja ka avancuar dhe mjekët nuk i kanë dhënë shpresë për të shpëtuar.
Ajo është vetëm 40-vjeç dhe është nënë e një djali 2-vjeçar. Pavarësisht gjendjes së saj shëndetësore Rachael ka marrë iniciativën për të shkruar një libër ku do të flasë për veten dhe djali i saj ta ketë këtë libër kur ajo të mos jetë më.
“Është një ide që unë e kam pasur që kur u diagnostikova, por nuk e mendoja se do e bëja” ka thënë Bland, për The Sun.
Gazetarja e njohur dëshiron t’i tregojë djalit gjithçka që duhet të dijë për të dhe sa herë të ndjejë mungesën e saj të ketë pranë librin që ajo do t’i lërë si dhuratë.
“Doja vetëm të lë diçka pas për të. Kur djali të rritet, burri im Steve do i tregojë të gjitha kujtimet tona, por ai nuk i mban mend ato ashtu siç i kujtoj unë”, ka thënë Bland.
Ajo është shprehur se për të është shumë e vështirë të mendojë që djali i saj do të rritet pa praninë e saj.
“Imagjinoni duke u rritur pa u kujtuar se kush jam unë. Mërzitem shumë kur e shikoj atë dhe këto mendime shfaqen në mendjen time. Mendoj, nëse ai është i mërzitur për ndonjë gjë, çfarë do të bëjë ai nëse nuk jam? Unë shpresoj se ai mund të kuptojë personalitetin tim nga libri dhe të dëgjojë zërin tim përmes saj. Nuk e di se sa kohë ka mbetur dhe unë vetëm dua të lë diçka për të që të mos më harrojë”, u shpreh Bland.
