Gashi ka paralajmëruar prej kohësh se do të publikojë një album të ri. Artisti me origjinë shqiptare ka punuar shumë për të dhe duket se ai po e pret me padurim publikimin. Gashi ka bërë të ditur se ai ka gati 20 këngë të reja, të cilat do të jenë pjesë e albumit dhe se do e çojnë muzikën në një tjetër nivel.
Ndërkohë së fundmi ai ka treguar se përse ka vendosur ta titullojë albumin e tij “Elevators” (Ashensorët). Gashi ka zbuluar se ai i ka frikë ashensorët dhe ka vendosur që në 2021-n të përballet me frikërat e tij më të mëdha, ndaj ka menduar këtë emër.
“‘Elevators’ do të quhet albumi im i ri… të gjithë ata që më njohin mua e dinë që unë i urrej ato. Vendosa ta titulloj kështu, sepse në 2021 –n e ndjej se duhet të përballemi me gjithë frikërat tona, në mënyrë që të ngjitemi më lart”, ka shpjeguar artisti me origjinë shqiptare.
Kujtojmë se disa javë më parë Gashi ka nënshkruar një kontratë me studion muzikore RCA Records, që është akronim i Radio Corporation of America. Kjo studio muzikore është në pronësi të Sony Music Entertainment, që është kompania muzikore më e njohur në mbarë botën.
