Pavarësisht ankesave të njëpasnjëshme nga qytetarët për shqetësimet në lidhje me muzikën e lartë pas orës 20:00 në resortin “Prestige” në Malin e Robit, askush nuk po bën asgjë!
Thirrjet tona duket sikur kanë rënë në veshin e shurdhër jo vetëm të policisë, por edhe të ministrit të Brendshëm, Sander Lleshaj, i cili është vënë në dijeni të shkeljeve por sërish zgjedh të mos veprojë, në një kohë që e njeh mjaft mirë biznesin të cilit i referohemi, pasi ka qenë personalisht atje!
Ministri i Brendshëm, Sander Lleshaj në “Prestige Resort”
Që prej së shtunës, iconstyle.al ka publikuar pamjet kur një patrullë policie me targë AA 425 VF, shkonte shumë pranë resortit rreth orës 2:00, i binte njëherë sirenës sa për paralajmërim dhe largohej ndërkohë që muzika vijonte pavarësisht ankesave të banorëve atje dhe orës së vonë.
I pyetur për këtë shkelje, shefi i Postës së Policisë në Golem, Nazmi Zylfo, pranoi se ka pasur ankesa për muzikën, por tha se patrulla ka konstatuar në vendngjarje se nuk ka pasur muzikë. Madje ai tha se rënia e sirenës është procedurë e policisë përkundrejt bizneseve me hapësira të mëdha:
“Për çdo verifikim raportohet te instancat tona, bëhet evidentimi i problematikës së ndjekur dhe konstatuar. Ka pasur ankesa dhe jo vetëm për Prestige Resort por edhe në vende të tjera. Për çdo telefonatë që ka pasur është dërguar shërbimi dhe nga raportimi i shërbimit ka konstatuar se nuk ka pasur muzikë. Rënia e sirenës korrespondon me madhësinë e resortit, po ka sipërfaqe të madhe e rrethuar komplet dhe lokali me sa di unë është në kat të shtatë, ngjitesh në ashensor. Për çdo radhë është shkuar në vend është verifikuar ankesa dhe nuk ka rezultuar që të ketë muzikë”.
Por pamjet tona tregojnë se muzika ka vijuar edhe pas vizitës deri te porta e policisë, e cila në këtë moment që flasim duhet të kishte proceduar njësoj siç procedohet me ato bizneset familjare që i gjobitin miliona lek dhe ju pezullojnë aktivitetin në rast të shkeljes së përsëritur të ligjit.
“Në Golem ligji është i zbatueshëm si në të gjithë territorin e republikës dhe në Tiranë. Jo nuk i kemi vendosur gjobë, për biznesin në fjalë nuk është konstatuar në shkelje”.
Atëherë le t’i kujtojmë pak pamjet kur 3 efektivët shkojnë pranë biznesit dhe nuk ndërmarrin asnjë veprim, ndërkohë që muzika është në sfond. Sikur të mos mjaftonte kjo, mbrëmjen e së hënës iconstyle.al ka shkuar në vendngjarje dhe ka komunikuar me disa efektivë të cilët ishin në krye të detyrës atë natë.
Ata na komunikuan qartë se urdhri për t’i lënë dorë të lirë biznesit në fjalë, paska ardhur nga lart. Sipas komunikimit me patrullën e Rendit (në foto, targa AA 562 VF): “Askush nuk mund të shkojë te Prestige Resort, dhe nëse shkon, është e kotë”! Edhe nëse patrulla shkon pranë resortit, maksimumi që mund të bëjë është të flasë me rojen e tij ose t’i bjerë sirenës.
Nuk e dimë se cilat instanca apo struktura të policisë, bashkisë Kavajë apo Ministrisë së Brendshme janë përgjegjëse për këtë urdhër që i ndalon patrullat të bëjnë detyrën e tyre në respektim të ligjit, por ministri Lleshaj është shprehur konkretisht “do të më shihni te fytyra e policëve, si të jenë ata, ai jam unë”.
Kjo nënkupton se ministri i Brendshëm Sandër Lleshaj është përgjegjës për këtë abuzim që bëjnë vartësit e tij në emër të një “urdhri nga lart”.
https://www.instagram.com/p/CESM-ggg7xW/?utm_source=ig_embed
Ministri bashkë me profesionistët e PR-it në Policinë e Shtetit, po reklamojnë me zë të lartë çdo ditë rastet e gjobitjes së bizneseve familjare në hall në kushte krizë, ndërkohë kur është fjala për të mëdhenjtë, policia bëhet e verbër ndaj abuzimeve.
Mbrëmjen e djeshme janë konstatuar sërish shkelje nga biznesi në fjalë dhe muzika ka vijuar pavarësisht ankesave (Pamjet poshtë). Ne do të vijojmë të ankohemi sërish në SHÇBA, e cila do të kryejë hetimin administrativ përkatës, në përputhje me ligjin nr. 70/2014 “Për Shërbimin për Çështjet e Brendshme dhe Ankesat ne Ministrinë e Punëve te Brendshme” dhe aktet nënligjore për zbatim të këtij ligji.
Sot mediat janë bërë tepër të ndjeshme duke publikuar shqetësimet e qytetarëve dhe rastet flagrante, ndërkohë që duhet të jetë vetë detyra e policisë t’i identifikojë ato dhe t’u japë zgjidhje. Ne nuk po merremi me çështje madhore si krimi i organizuar në vend, ndaj ministri e ka në dorë të bëjë kaq gjë për çështjet e rendit, sa i përket muzikës apo dhe qarkullimit, në shërbim të qytetarëve.
/Iconstyle.al
