Një figurë tashmë ikonike për tifozët shqiptarë, Besmir Limani, i njohur si “fytyra me shqiponjë” ka ndaluar këtë të shtunë në qytetin simbol të pavarësisë, Vlorë, përpara ndeshjes shumë të pritur mes Shqipërisë dhe Serbisë.
Me fytyrën e pikturuar me shqiponjën dykrenare, Limani ka vizituar shtëpinë historike të pavarësisë, duke dhënë një mesazh simbolik për krenarinë kombëtare. Ai shprehet se përjeton çdo moment me emocion të madh dhe krenari, duke ndjekur Kombëtaren Shqiptare pa ndërprerje që prej 52 ndeshjesh.
Me origjinë nga Struga, por banues në Zvicër që prej moshës 4-vjeçare, Limani është kthyer në një figurë të dashur për shqiptarët anembanë botës. Pasioni i tij për fanellën kuqezi është bërë frymëzim, ndërsa imazhet e tij janë transmetuar nga mediat kombëtare dhe ndërkombëtare në çdo ndeshje ku merr pjesë.
Tashmë i pajisur edhe me pasaportë shqiptare, ai mbetet një nga mbështetësit më besnikë të Kombëtares. Pas vizitës në Vlorë, Limani është nisur menjëherë drejt Tiranës, aty ku do të ndjekë nga afër përballjen emocionuese Shqipëri–Serbi.
