Hollywood-i humbet një tjetër ikonë romantike. Aktori legjendar George Clooney ka konfirmuar se nuk do të bëjë më skena puthjesh në filmat e tij, duke shpallur kështu fundin e një epoke për rom-com-et me të. Lajmi u bë i ditur gjatë një interviste për Daily Mail, ku aktori shpjegoi vendimin e tij pas një bisede me bashkëshorten e tij.
“Kur mbusha 60 vjeç, bisedova me gruan time dhe i thashë: ‘Mund të luaj ende basketboll me të rinjtë, jam në formë, por pas 25 vitesh do të jem 85 vjeç. Nuk ka rëndësi sa granola ha, ky është një numër real’,” u shpreh Clooney.
Aktori 63-vjeçar ka qenë i njohur për rolet e tij romantike në filma si Up in the Air me Vera Farmiga, Ticket to Paradise me Julia Roberts dhe One Fine Day me Michelle Pfeiffer. Përveç rom-com-eve, ai ka shfaqur cilësi të forta si protagonist në filma si Ocean’s Eleven, Fantastic Mr. Fox, O Brother Where Art Thou? dhe Gravity.
Clooney ka theksuar më parë për 60 Minutes se nuk synon të konkurrojë me aktorët e rinj të 25 vjetëve dhe se rolet romantike nuk i përshtaten më moshës së tij. Vendimi është pjesë e përpjekjes së tij për të përzgjedhur rolet me maturi dhe për të shmangur situatat që nuk e përfaqësojnë më.
Projekti i tij i fundit, Jay Kelly në Netflix, pasqyron vendosmërinë e tij, pasi nuk përfshin skena romantike. Megjithatë, aktori do të vazhdojë aventurat e tjera kinematografike, përfshirë Ocean’s 14, vazhdimin e shumëpritur të sagës ikonike nga 2001, ku do të rikthehen yjet origjinalë të kastit.
Ky lajm shënon një ndryshim të dukshëm në karrierën e Clooney-t, duke shënuar fundin e epokës së tij si një nga “heartthrob”-ët më të dashur të kinemasë moderne.
