Një valë shqetësimesh ka përfshirë Rivierën Franceze pas dy ndërprerjeve të njëpasnjëshme të energjisë elektrike, me autoritetet që po flasin hapur për akte sabotimi të qëllimshëm. E fundit ndodhi gjatë natës në Nice, ku një zjarr shpërtheu në një nënstacion elektrik duke lënë mbi 45 mijë banesa pa energji elektrike.
Zjarri, i cili nisi rreth orës 2 të mëngjesit, dyshohet të jetë shkaktuar me dashje. Policia ka gjetur shenja të qarta ndërhyrjeje një derë e thyer dhe gjurmë gomash pranë nënstacionit çka ka ngritur alarmin për një akt të organizuar.
Ndërprerja preku jo vetëm qytetin e Nice, por edhe aeroportin, linjën e tramvajit dhe zonat përreth, përpara se energjia të rikthehej mëngjesin e së shtunës. Kryetari i bashkisë, Christian Estrosi, e cilësoi këtë një sulm të hapur ndaj infrastrukturës kombëtare, ndërsa zyrtarë të tjerë lokalë folën për “origjinë kriminale”.
Ky incident vjen vetëm një ditë pasi një tjetër ndërprerje masive energjie goditi Kanën, në kulmin e Festivalit Ndërkombëtar të Filmit. Prokuroria konfirmoi se katër shtylla të linjës së tensionit të lartë ishin prerë me mjet prerës një tjetër veprim i dyshuar sabotues që ndërpreu disa nga aktivitetet e mëngjesit në festival, përpara se organizatorët të kalonin në gjeneratorë privatë.
