I është dhënë lamtumira e fundit 35-vjeçares Hamide Magashi, e cila u vra nga burri i saj përballë maternitetit në Prishtinë. Në Llugaxhi të Lipjanit u mbajt këtë të premte ceremonia mortore e 35-vjeçares, e cila dy ditë më parë u qëllua me armë zjarri për vdekje para Klinikës së Gjinekologjisë në Prishtinë.
Miq, të afërm, familjarë por edhe politikanë të Kosovës, i dhanë lamtumirën e fundit të resë, e cila ishte në muajin e 9 të shtatzënisë. Autor i dyshuar i ngjarjes së rëndë është ish-bashkëshorti i saj, Sokol Halili, i cili vijon të jetë në kërkim.
35-vjeçarja ishte ndarë nga Halili vetëm 3 muaj pas martesës, për shkak të dhunës së vazhdueshme që ai ushtronte. Një ditë më parë, motra e viktimës rrëfeu se ishin detyruar të kërkonin edhe ndihmën e policisë për ta hequr nga duart e tij 35-vjeçaren.
Sipas Burbuqe Brahimit, motrës së viktimës, kërcënimet kishin vazhduar edhe pas ndarjes. Madje ai kishte kërcënuar se do të vrasë atë, motrën e saj të vogël dhe dhëndrin me të cilët jetonte Hamidja.
Ndonëse kishte urdhër-mbrojtje për 35-vjeçaren, ajo u vra në oborrin e QKUK-së. Ministrja e Drejtësisë së Kosovës ka paralajmëruar shkarkime sapo të vërtetohet dështimi në hallkat institucionale.
