Një grua është arrestuar në New Hampshire lidhur me vdekjen e dyshimtë të vajzës së saj foshnjë, trupi i së cilës u gjet në një pellg rreth një vit më parë.
Zyra e Prokurorit të Përgjithshëm të New Hampshire konfirmoi të enjten, më 26 shkurt, arrestimin e Hepay Juma, 26 vjeçe, banuese në qytetin Manchester. Sipas njoftimit zyrtar, arrestimi lidhet me vdekjen e një foshnje femër, e gjetur pa shenja jete në Pine Island Pond, në Manchester, më 27 mars 2025.
Autoritetet bëjnë me dije se Juma akuzohet për vrasje të shkallës së dytë nga pakujdesia, me pretendimin se ka shkaktuar vdekjen e vajzës së saj, të njohur nga policia si “Baby Jane ‘Grace’ Doe”, në rrethana që tregojnë shpërfillje ekstreme ndaj jetës njerëzore.
Në deklaratë theksohet se rrethanat e sakta të ngjarjes mbeten ende nën hetim aktiv. Po ashtu, autoritetet sqarojnë se akuzat janë pretendime dhe se e dyshuara konsiderohet e pafajshme derisa të provohet e kundërta në gjykatë.
Sipas mediave amerikane, Hepay Juma pritet të paraqitet për seancën e parë gjyqësore të premten, më 27 shkurt, në Gjykatën e Qarkut të Manchesterit. Një zëdhënës i Zyrës së Prokurorit të Përgjithshëm deklaroi se, për shkak se çështja është ende e hapur, nuk do të jepen informacione shtesë përtej njoftimit zyrtar.
Rasti tronditi komunitetin lokal edhe vitin e kaluar, kur për foshnjën u organizua një ceremoni mortore. Policia e quajti vajzën “Grace” për të nderuar, sipas tyre, dhembshurinë e treguar nga qytetarët që refuzuan ta linin jetën e saj të mbetej e panjohur.
Autoritetet vijojnë hetimet për të sqaruar plotësisht ngjarjen.
