Në fazën e dytë të programit të BE-së, “EU4Schools”, parashikohet që të ndërtohen 36 objekte arsimore, ku do të përfshihen edhe shkolla të mesme, shkolla 9-vjeçare, si dhe disa çerdhe dhe kopshte të dëmtuara nga tërmeti i 26 nëntorit.
Disa objekte do të rindërtohen nga e para, ndërsa disa të tjera do t’i nënshtrohen ndërhyrjeve për rikonstruksion.
Ministria e Rindërtimit ndërkohë ka miratuar edhe listën për rindërtimin e 21 objekteve arsimore, si dhe rikonstruksionin e 15 të tjerave, në kuadër të fazës së dytë të programit “EU4Schools” të Bashkimit Europian.
Nga lista e donatorëve për tërmetin, përveç BE-së, përfshihen edhe donatorët si KfW, fondet e shteteve si Katari, Sllovenia dhe Sllovakia.
Bazuar në programin total të donatorëve, Ministria e Rindërtimit ka bërë me dije se gjithsej parashikohen të ndërtohen dhe rikonstruktohen 73 objekte arsimore, ku gjatë fazës së parë të programit të BE-së “EU4S”, ishin 22 shkolla, ndërsa në fazën e dytë të tij do të jenë 40 objekte të tjera arsimore.
Po ashtu donatorët e tjerë si KfW, do të ndërtojë 3 shkolla, shteti i Katarit do të ndërtojë po ashtu 3 shkolla, si dhe fondet e shteteve të Sllovenisë dhe Sllovakisë parashikohet që të ndërtojnë 4 shkolla.
Gjithashtu edhe Fondi shqiptar i Zhvillimit (FSHZH), parashikohet që të ndërtojë 37 objekte arsimore.
Ministria e Rindërtimit ka deklaruar se punimet në 34 shkolla pritet që të përfundojnë në dhjetor të vitit 2020, ndërsa 3 objekte të tjera arsimore priten që të ndërtohen në janar të vitit 2021.
Ndërkohë në qarkun e Durrësit, Fondi shqiptar i Zhvillimit(FSHZH), është drejt përfundimit të punimeve në 9 shkolla, kryesisht 9-vjeçare, deri më 26 nëntor.
Sakaq edhe në Bashkinë e Tiranës, parashikohet në total, që të bëhen ndërhyrje në 37 objekte arsimore.
Ministria e Rindërtimit ka pohuar më herët se kanë filluar punimet në disa shkolla, si në shkollat “Murat Toptani”, gjimnazin e përgjithshëm “Sami Frashëri”, si dhe shkolla “Mangull”.
Gjithashtu po në qarkun e Tiranës, janë në proces shembjeje, rikonstruksioni apo piketimi, edhe 14 objekte të tjera.
Kujtojmë se në total, për rindërtimin e shkollave në të gjithë zonat e prekura nga tërmeti i 26 nëntorit të vitit të kaluar, nga buxheti i shtetit për këtë vit, janë alokuar 7.5 miliardë lekë fonde./Iconstyle.al/
