Vetëm pak më parë ka ndërruar jetë në spitalin e traumës 20-vjeçarja e quajtur Xhesika Biqiku, e cila ndodhej në gjendje kome.
Ajo jetonte në zonën e Kombinatit në Tiranë dhe ishte dëmtuar pasi disa tulla nga pallati i kishin rënë asaj mbi kokë.
Mëngjesin e sotëm, Ilia Biqiku u takua me kryeministrin Rama dhe i kërkoi atij ndihmë që të bijën t’ia dërgonin për ndihmë të specializuar në Itali.
“Kam gocën në spital. Është në gjendje të rëndë tek Trauma. Erdhi doktori italian. Thuaju një llaf të mirë të ma çojnë në Itali. Mbushi 20 vjeç. Kam edhe gocën e madhe të sakatuar.”- i tregoi ai kryeministrit.
Nisja e Xhesikës me helikopter për në Itali ishte parashikuar për dy ditë më parë, mirëpo ajo ishte në gjendje të rënduar shëndetësore ndaj diçka e tillë nuk ishte e mundur.
Pasi panë gjendjen e vajzës 20-vjeçare, mjekët italianë treguan se një lëvizje e trupit të Xhesikës për ta transportuar ishte fatale.
Megjithëse ata u ndihmuan ta mbanin në jetë dhe prisnin që gjendja e saj të përmirësohej, Xhesika nuk arriti t’ia dalë dot, duke humbur jetën sot në Spitalin e Traumës.