Ka kaluar më shumë se një vit që kur shkrimtarja e mirënjohur Flutura Açka humbi djalin e saj të vetëm, Jerinin, si pasojë e një sëmundjeje të pashërueshme.
Herë pas here ajo vendos që mallin dhe dashurinë që ka për të birin ta ndajë me publikun dhe së fundmi ka qenë e ftuar në emisionin “Provokacija” për të folur lidhur me të.
Açka ka treguar se i biri i ndjerë i ka futur në gjak repin dhe ajo ka zbuluar një bisedë që ka bërë me të lidhur me këtë temë.
Flutura tregon një nga parashikimet e djalit të saj dhe thotë se do t’i vijë dita edhe reperit të njohur Kendrick Lamar për të fituar një çmim me rëndësi si, Nobel.
“Repi i Kosovës është një muzikë e natyrshme dhe një pjesë e tyre është një muzikë shumë e bukur. Dhe këtë e kam mësuar prej tim biri, ai më ka dhënë leksione për repin e Kosovës dhe më shpjegonte kadencat, se unë nuk e kuptoja, madje pati një moment që edhe po më bezdiste se isha e imponuar nga kjo lloj muzikë. Unë vonë e kuptova që pas kësaj është poezia dhe im bir pëlqente poezinë. Por u kthye në trend dhe tani është prishur thelbi i asaj nga e ka pasur burimin. Është dëmtuar. Kënga e fundit që kam dëgjuar me tim bir dhe thërrisnim me zë të lartë “I vogël” nga Ledri Vula. Po ta dëgjosh atë këngë ti kupton që është një poezi shumë e bukur pas kësaj. Më thoshte djali për Kendrick Lamar, kur e mori Nobelin Bob Dylan më tha: ‘Ma do të vijë dita edhe për Kendrick Lamar’. Uroj që profecia e tim bir të plotësohet”, u shpreh shkrimtarja.
