Pas grabitjes që ndodhi ditën e martë në aeroportin e Rinasit, ku si pasojë e përplasjes së policisë me grabitësit mbeti i vdekur një prej këtyre të fundit, detaje të reja kanë dalë në dritë lidhur me sasinë e parave që u vodhën.
Kudo në media fillimisht u përfol se nga barku i avionit që do të udhëtonte drejt Vjenës janë grabitur 10 milion euro.
Mirëpo ditën e sotme ishte i ftuar në emisionin “Të Paekspozuarit” në “News 24” Kreu i Shoqatës së Bankave, Spiro Brumbulli.
Ai deklaroi publikisht se shuma e parave të grabitura është më pak se ajo që është përfolur kudo: “Unë thashë që nuk janë vjedhur 10 milion euro, mund të jenë 5 deri në 6 milion euro, ka pasur edhe dollarë.”
Rikujtojmë se grabitësit janë arratisur dhe aktualisht janë personat më të kërkuar nga drejtësia shqiptare. /balkanweb.com
