Është marrë në pyetje nga prokuroria djali që ka bashkëjetuar me Eglantina Bucin, vajza që u vra nga vëllai me urdhër të babait në vitin 2012.
Ai ka deklaruar se me anëtarë të familjes Buci, janë takuar në Tiranë dhe ata nuk e kishin dëshirë që ai dhe Eglantina të krijonin një lidhje.
Djali tregon sipas Report tv se, Eglantinën e kishin fejuar me një djalë tjetër pa dëshirën e saj. Pas kësaj ai ka hequr dorë nga kjo lidhje dhe nuk është interesuar asnjëherë për fatin e Eglantinës.
Por, prokuroria, ka pyetur dhe të “fejuarin” që familja i kishte bërë për burrë Englantinës. Ai ka treguar se asnjëherë nuk kanë qëndruar bashkë me Eglantinën, megjithëse familja gjatë një takimi i kishte shpallur të fejuar.
Eglantina qëndronte herë në disa kushërinj dhe herë në disa shoqe dhe te xhaxhai, derisa në vitin 2012, u ekzekutua me disa plumba nga vëllai i saj Shkëlzen Buci, i cili kishte marrë urdhër të prerë nga babai Faiku, për të ekzekutuar motrën dhe më pas mbuluar me gurë në Malin me Gropa.
Faik Buci, babai i cili akuzohet nga prokuroria e Tiranës, si personi që urdhëroi vrasjen e vajzës së tij, Eglantina Bucit, rezulton të jetë i dënuar me 8 muaj burg për akuzën e “Veprimeve që pengojnë zbulimin e të vërtetës”. Fillimisht Buci, është dënuar me 1 vit burgim, por për shkak të gjykimit të shkurtuar, Faiku, është deklaruar fajtor dhe dënuar përfundimisht me 8 vjet heqje lirie.
Edhe Elona, motra e Eglantina Bucit, ka thënë në dëshminë e saj, se vëllai Shkëlzeni nuk ka bërë asgjë në kokën e tij dhe për gjithçka nxitej nga 66-vjeçari, madje edhe për atentatin ndaj aktorit Mishel Prela. E bija e Faikut tregon për Fax News se me të atin dhe vëllain i ka shkëputur kontaktet prej 15 vitesh pasi as për të nuk pranonin lidhjen e saj me bashkëshortin që sot jeton dhe ka 2 fëmijë.
/Report tv
