Një spektakël kushtuar muzikës së vërtetë, i cili e njohu publikun me disa nga emrat e njohur që kishin një talent të fshehur për të kënduar. Finalja mbrëmjen e së dielës në “C’est la Vie” i dha kupën dyshes Lind Islami dhe Kristi Karkanaqes.
Lindi është djali që i mori zemrën jurisë dhe publikut në “The Voice 2”, ndërsa Kristi është i riu që i ka rrëmbyer zemrën qytetarëve të Tiranës.
Imazhin e Kristit e lidhim me sheshet dhe në fakt aty e ka pikënisjen gjithçka. Ai ka rrëfyer më herët se dëshiron të qëndrojë pranë njerëzve dhe mbi të gjitha i pëlqejnë gjërat e sinqerta.
“Iconstyle.al” vendosi të kontaktonte me Kristin, për të marrë përshtypjet e fitores dhe atë që i ofroi ky spektakël.
I pyetur nëse ai dhe Lindi e ndjenin fitoren përgjigjja ishte “jo”.
“Nuk e ndjeja, nuk ishte ai qëllimi im kryesor. Thjesht doja të kënaqesha dhe të jepja më të mirën time”, shprehet Kristi.
Nëse kupën nuk do ta merrte ai, dëshira e tij është që t’i shkonte dyshes me të cilën u përballën. Në këtë konkurs ai fitoi diçka akoma më të madhe sesa kupa:
“Çifti im i preferuar ishte Ori dhe Anxhela, jo vetëm vokalisht. Kam një lidhje të mirë shoqërore me Orin, aq sa mund ta quaj si motrën e madhe”.
“Kurrë mos u dorëzo”! Ky ishte nga mësimet që i dha të gjithë publikut spektakli “C’est la vie”, ndërsa për Kristin ishte një “shkollë”.
“Kjo eksperiencë më vlen shumë, është si një shkollë për mua. Ka vlera të mëdha vetë dalja në ekran, aq më shumë në një super televizion si Klan TV, që gjej rastin ta falënderoj, jo për qok, por për mirënjohje”.
Rrugëtimi i Kristi Karkanaqes deri më tani nuk ishte i lehtë, por ai na dëshmoi se asgjë nuk është e pamundur.
“Mesazhi që jap për të gjithë është që në fillim të përpiqen të jenë njerëz të mirë, pastaj kjo është busulla më e mirë për të gjetur rrugën e duhur”, thotë ai.
Burimi: Iconstyle.al
