Prej ditësh, vendi ynë është nën pushtetin e flakëve dhe po përballet me disa vatra zjarri nga veri në jug, ndërsa ato më problematike vijojnë të jenë në Tragjas dhe Karaburun të Vlorës.
Kjo gjë nuk ka shqetësuar aspak kreun e Emergjencave Civile, Haki Çakon, i cili pas kaq shumë ditësh dhe pas shumë kërkesave publike, më në fund ka vendosur që të kthehej në detyrë.
Ai ndërpeu pushimet dhe udhëzoi ushtrinë nga Vlora, e cila ka zbritur në terren. Çako udhëzoi ata të bëjnë një kordon duke punuar me kazma dhe lopata për shuarjen e flakëve, një mënyrë kjo aspak efikase dhe tepër e rrezikshme dhe për ushtrinë.
Ndërkohë, pas më shumë se 10 ditësh, vetëm një helikopter ka nisur ndërhyrjen nga ajri, një reagim ky tejet i vonuar në një situatë kaq të rrezikshme për vendin.
Dhe në këtë situatë kaq të rrezikshme që i kanoset vendit, është e domosdoshme ndërhyrja nga ajri për shuarjen e flakëve, por duket se as kjo nuk do të jetë e mundur.
Ministri i Mbrojtjes, Niko Peleshi ka pranuar së fundmi se Shqipëria ka vetëm një helikopter për shuarjen e flakëve. Ai është mjaftuar me shpresën se do të gjejë tek operatorë të tjerë helikopterë që mund të shuajë zjarrin.
Kujtojmë se Rama ka vlerësuar ushtrinë kur Olta Xhaçka ka qenë Ministre e Mbrojtjes duke thënë se helikopterët janë të pajisur për këto raste, ndërkohë koha e tregoi që nuk janë dhe si gjithmonë do të drejtojmë sytë nga vendet e tjera me shpresën e vetme se të tjerët mund të na ndihmojnë, pasi vendi ynë nuk i ka kapacitetet e duhura as për situata të tilla kaq alarmante.
