Fjalimi i fundit i Barack Obama-s si president, përloti të gjithë të pranishmit, por fjalët e prekën edhe vet atë. Ai e nisi fjalimin duke u kërkuar amerikanëve të mbrojnë demokracinë e tyre. “Amerika është sot, në çdo drejtim, një vend më i mirë e më i fuqishëm nga sa ishte 8 vite më parë”, tha shefi në largim i Shtëpisë së Bardhë përpara simpatizantëve të mbledhur në qendrën e konventave “McCormick Place”.
Por ai paralajmëroi njëkohësisht se demokracia vihet nën kërcënim, kur merret si e mirëqenë.
“Mbrojeni mënyrën tonë të jetesës më shumë sesa ushtrinë. Demokracia mund të vuajë kur i dorëzohemi frikës. Ndaj, si qytetarë duhet të mbetemi vigjilente ndaj agresionit të jashtëm, duhet të ruhemi nga dobësimi i vlerave që na bëjnë këta të cilët jemi sot”, tha Obama.
Obama thuajse iu lut amerikanëve të të gjitha shtresave e origjinave, t’i shohin gjërat edhe nga këndvështrimi i njëri-tjetrit. “Duhet të tregohemi të vëmendshëm e të dëgjojmë. Ju kërkoj të besoni, jo në aftësinë time për të sjellë ndryshim, por në tuajën”.
Presidenti i parë me ngjyrë i Amerikës e mori fillimisht postin në vitin 2008, me një mesazh shprese dhe ndryshimi. “Ama ndryshimi, ishit ju vetë, ndërsa mua më bëtë një njeri më të mirë”.
Pas kësaj erdhi edhe një homazh prekës drejtuar Zonjës së Parë, Michelle Obama, për të cilën tha i përlotur se e bëri Shtëpinë e Bardhë një vend që i përket të gjithëve. Ky moment i preku të gjithë, të cilët u ngritën në këmbë për të duartrokitur për Zonjën e Parë, ndërsa edhe vajza e tij Malia fshiu disa herë lotët.
“Michelle, Michelle LaVaughn Robinson, ti vajzë jugu ke qenë për këto 25 vite jo vetëm bashkëshortja dhe nëna e fëmijëve të mi, por edhe mikja ime më e mirë. Ti more mbi shpatulla një rol, të cilin nuk e kërkove, megjithatë e përmbushe me hir dhe guxim, me stil e humor. Një brez i tërë tani e hedh vështrimin më lart, sepse të ka ty si model”, tha Obama.
Pasardhësi i tij Donald Trump, që e bën betimin më 20 janar, është zotuar t’i përmbysë disa prej politikave më të rëndësishme të Obama-s. Njerëzit në qendrën e konventave nisën në një moment të thërrasin: “Edhe 4 vite të tjera!”. Por Obama u përgjigj duke buzëqeshur: “Atë nuk e bëj dot!”, kjo pasi kushtetuta nuk u lejon presidentëve që të marrin më shumë se dy mandate.
Burimi: Daily Mail
