Selena Gomez ka nisur një fushatë të re për rëndësinë e gjuhës së përdorur në “Muajin e Ndërgjegjësimit për Shëndetin Mendor”. Këngëtarja dhe aktorja 29-vjeçare, e cila ka qenë një promovuese e hapur e shëndetit mendor dhe rëndësisë së tij, doli në rrjetet sociale të dielën për të njoftuar nisjen e një fushate të re të quajtur “Fjalët e tua kanë rëndësi”. Kjo nismë, e cila synon të “edukojë për fuqinë e fjalëve tuaja kur flasim për shëndetin mendor”, është një partneritet midis kompanisë së kozmetikës së Gomez, “Rare Beauty” dhe “Ndihmës së Parë të Shëndetit Mendor”.
“Fjalët e tua kanë rëndësi”, i shkroi Gomez 317 milionë ndjekësve të saj në Instagram.
“Fjalët mund të jenë pengesë për njerëzit që kërkojnë ndihmë dhe të rrisin stigmën që lidhet me shëndetin mendor. Shumë nga këto fjalë janë normalizuar dhe pranuar për një kohë shumë të gjatë, por është koha që të ndërgjegjësojmi për fjalët që përdorim… sepse ato kanë rëndësi”, shkroi ajo.
“Edhe në videon time në TikTok, tani e kuptoj se fjalët e mia kanë rëndësi dhe mund të kenë një ndikim të fuqishëm. Ashtu si të gjithë ju, unë po mësoj çdo ditë. Mund të rrëshqasim, dhe kjo është në rregull, ajo që është e rëndësishme është që të përpiqemi të bëjmë më mirë”.
Rare Beauty ofroi disa këshilla në Instagram për ndryshimin e gjuhës për t’u fokusuar te personi dhe jo te shëndeti i tij mendor. Për shembull, në vend që t’i referohemi dikujt si “një person bipolar”, mund të thuhet “një person që ka çrregullim bipolar”. Ose ndryshimi i “dikujt që kreu vetëvrasje” në “një person që vdiq nga vetëvrasja”.
Për Muajin e Ndërgjegjësimit për Shëndetin Mendor të vitit të kaluar, Gomez dhe Rare Beauty nisën fushatën Mental Health 101, e cila “i kushtohet mbështetjes së edukimit të shëndetit mendor dhe inkurajimit të mbështetjes financiare për më shumë shërbime të shëndetit mendor në shërbimet arsimore”, shkroi ajo në Instagram.
Gomez fillimisht foli për diagnozën e saj bipolare në serinë e saj “Bright Minded Instagram Live” në prill 2020. Në shtator 2019, ajo fitoi çmimin “McClean 2019” për mbrojtjen e saj të shëndetit mendor dhe detajoi luftën e saj me ankthin dhe depresionin gjatë fjalimit të pranimit.
