Një histori e veçantë ka mbërritur nga Britania, aty ku shqiptarët po zotërojnë bizneset e kultivimit të kanabisit dhe që gjithnjë janë një hap para policisë.
Këtë herë një menaxher shqiptar që quhet Avdi dhe është nga Tirana, ka rrëfyer sesi mori një ofertë për një punë që do t’i siguronte super të ardhura në Mbretërinë e Bashkuar.
“Nuk ka asgjë në Shqipëri. Miqtë e mi po më thoshin se kishte shumë punë në Britani dhe puna lidhej me kanabisin. Ata gjithashtu më thanë që do të kisha shumë fitime nga ana monetare“, ka rrëfyer ai për VICE UK.
Artikulli flet për pagën e ulët mesatare në Shqipëri dhe papunësinë e të rinjve që i shtyn ata për t’u larguar.
“Njerëzit mendojnë se Mbretëria e Bashkuar është një parajsë. Unë u thoja të gjithëve që e dija se do të fitoja para të mëdha”, thotë Avdiu për median britanike.
Kur Avdiu ishte 28 vjeç, dy vite më parë fluturoi për në Francë përmes një vize 3-mujore Shengen. Pasi mbërriti në Francë ai pagoi 14 mijë paund për një vend në një kamion.
“Problemi është se askush në Angli nuk ka letra. Marrja e një pune të rregullt është e pamundur për një emigrant të paligjshëm. Fillimisht emigrantët fillojnë të punojnë me makinat (me pronësi shqiptare) e më pas mësojnë për këto gjërat e tjera“, vijon ai.
“Unë u thashë prindërve të mi se po punoja për një punë tjetër menaxheriale. Bëra para shumë shpejt dhe gjithashtu arrita t’i humbisja shumë shpejt. Kisha miq që kishin dhjetë ose 12 shtëpi dhe po bënin 100,000 £ në javë”, është shprehur shqiptari.
Gjashtë muaj pasi arriti në Angli, Avdiu u kap në Londër me 16 qese me drogë, të cilën synonte t’ia shiste tregtarëve lokalë. Ai kaloi gjashtë muaj në burg, para se të dëbohej sërish për në Shqipëri.
Sot Avdiu nuk është më në kontakt me miqtë e tij në Britani dhe nuk ka në plan të kthehet. Megjithatë ai thekson se kriminaliteti është gjithmonë një hap përpara policisë.
/Dosja.al
