Një film kushtuar historisë së arbëreshëve të Italisë pritet të vijë së shpejti në Netflix.
Filmi me titull “Arbëria” që pritet të shfaqet për publikun më 23 dhjetor i përket regjisores me origjinë kalabreze Francesca Olivieri, e cila ka shkruar edhe skenarin.
“Arbëria” është prodhuar nga shtëpia kinematografike “Open Fields Production” në bashkëpunim “Lucana Film Commision”, “Calabria Film Commision”, Ministria italiane e Kulturës e nga “Enti Publik i shoqatës së autorëve e botuesve italianë”.
“Arbëria” trajton jetën e arbëreshëve në Itali, ku Aida Greco, një stiliste e njohur, është protagonistja e këtij filmi.
Me vdekjen e babait të saj, ajo kthehet në fshatin ku lindi, i vendosur midis Kalabrisë dhe Bazilikatës.
Vazhdimi është një ballafaqim brezash tërësisht femëror, i cili do ta lejojë Aidën të përballet me distancën e krijuar ndër vite mes vetes dhe komunitetit të cilit i përket.
Filmi po vazhdon të jepet në sallat kinematografike italiane në territorin e rajonit të Kalabrisë ku është pritur mjaft mirë nga publiku.
Kryebashkiaku Erion Veliaj në një status në “Twitter” e konsideron filmin si tepër emocional dhe të bukur.
“Arbëria” në Netflix Një film tepër emocional dhe i bukur, kushtuar arbëreshëve të Italisë, sjellë nga regjisorja me origjinë kalabreze, Francesca Olivieri. Sa privilegj, të shohësh njëfilm për shqiptarët e mirë në një platformë të suksesshme si Netflix”, shkruan Veliaj.
