Si një princeshë e zbritur nga pasarela dukej Rita Ora në eventin e “BRIT Awards 2018”, që u mbajt më 21 shkurt në “O2 Arena”, në Londër. Këngëtarja me origjinë shqiptare kishte zgjedhur fustanin e shtëpisë së modës “Ralph & Russo”, nga koleksioni “Haute Couture” vjeshtë/dimër 2017-2018, me të cilin triumfoi në listën e personazheve të veshur më bukur.
Fustani i bardhë me ombren e mentës ishte i zbukuruar i gjithi me pendë, si dhe me kristale xhami.
Fustani ishte epitomi i magjepsjes, ndërsa Rita Ora është e para nga personazhet e njohura që shfaqet me fustanin e “Ralph & Russo”.
Marka e njohur ka veshur së fundmi Meghan Markle, kështu mund ta kuptoni që bën veshje, vetëm për emrat e mëdhenj të botës së modës.
Fustani luksoz nuk është i disponueshëm online, por “iconstyle.al” vendosi të kontaktonte faqen zyrtare të markës së njohur të modës për të marrë më shumë informacione lidhur me të.
Në përgjigjen zyrtare të marrë nga përfaqësuesja e “Ralph & Russo” thuhet se fustani ka një kosto prej 92,350 paund (pa TVSH-në) ose rreth 105,000 euro.
Gjithashtu një tjetër detaj që jepet nga marka e njohur është fakti, që si një fustan i linjës “haute-couture”, këngëtares shqiptare i janë dashur rreth 2-3 prova për të arritur përshtatjen perfekte me trupin e saj.
Marka tregoi edhe informacione për çmimet e koleksionit të modës së lartë:
“Çmimi më i ulët i “Haute Couture” është 25.000 paund dhe çdo fustan është një krijim unik”.
Rita Ora duket se është e dashuruar pas krijimeve të markës së njohur “Ralph & Russo”, pasi edhe zgjedhja e saj për në eventin e “Grammy Awards” më 28 janar ishte një fustan prej së njëjtës markë.
Fustani i zi kadife i kushtoi Orës 39,800 paund.
