Parlamenti Evropian ka votuar pro liberalizimit të vizave për Kosovën. Rreth 420 deputetë të PE dhanë votët e tyre për heqjen e vizave për qytetarët e Kosovës, ndërsa 186 të tjerë votuan kundër.
Pak momente para nisjes së votimit, raportuesja për Kosovën në Parlamentin Evropian, Tanja Fajon u shpreh se Kosova i ka përmbushur të gjitha kushtet për liberalizimin e vizave.
“Kërkuam të votohej pro liberalizimit të vizave për Kosovën. Nuk është një vendim përfundimtar, megjithatë vendimi i këtij parlamenti është jashtëzakonisht i rëndësishëm për procesin. Dihet se Kosova ka përmbushur të gjitha kriteret e kërkuar për liberalizim të vizave”- ka thënë raportuesja e BE-së për Republikën e Kosovës, Tanja Fajon.
Pas votës së Komisionit Evropian tashmë pritet edhe votimi nga Këshilli i Ministrave të BE-së.
Me liberalizimin e vizave, çdo qytetar i Kosovës është i lirë të udhëtojë në zonën shengen. Në rastet kur kanë bërë shkelje, atëherë vendosen gjoba që përfshijnë tre deri në pesë vite ndalim udhëtimi në zonën shengen. Sipas rregullave të reja, nuk mund të punohet në shtetet e zonës në kundërshtim me ligjin. Rregullat që aplikohen vetëm për qëllime udhëtimi, nuk u japin të drejtë qytetarëve shqiptarë për të qëndruar më shumë se 3 muaj dhe as të drejtën për t’u punësuar, apo për të kërkuar azil, në këto shtete.
