Prej shumë e shumë vitesh, xhamia dhe kisha ndajnë të njëjtin oborr në qytetin e Ferizaj. Kjo nuk është e gjitha, ekzistenca e objektit të kultit të xhamisë dhe kishës nuk është panorama e vetme që shfaq tolerantën ndërfetare në këtë qytet. Një miqësi e krijuar ndërmjet priftit dhe hoxhës dhe kërkesa e tyre e veçantë vërteton faktin se të gjithë banorët e qytetit shkojnë si mos më mirë me njëri tjetrin, pavarësisht besimit që i përkasin. Imami Naser Kosumi dhe prifti ortodoks Trajko Vllajkoviç kërkojnë që të shembet muri i ndërtuar mes tyre, e xhamia dhe kisha të jenë sa më pranë.
“Si ky monument ka pak në botë. Për shembull, ka xhami dhe kishë në një oborr. Nuk e di kur është ndërtuar, a është periudhë e gjatë, a është ndërtuar xhamia qysh më herët por meqënëse është ndërtuar në oborr, për mendim tim, kisha thënë që të jenë dy simbole pa ndërprerje, pa mur ndarës. Kështu do të ishte më mirë për opinionin, që mos të ketë pengesa” – është shprehur imami Naser Kosumi.
Ndërsa prifti ortodoks Trajko Vllajkoviç thekson se nuk duhet të ekzistojë asnjë ndarje mes kishës dhe xhamisë.
“Këto dy vende të lutjes janë krenare me njëra tjetrën dhe nuk ka rivalitet se cila është ndërtuar më parë, cila është më e madhe, cila është më e mirë, cila është më e bukur. Kjo gjë nuk qëndron para Zotit. Para tij, qëndron vetëm a je i mirë apo i keq, në fakt pak i mirë sepse nuk ekziston i keqi. Ai mur të cilin jeni duke e parë nuk është ndërtuar as nga unë e as nga Naseri”, tha prifti Vllajkoviç.
Edhe banorët e qytetit të Ferizaj, e vlerësojnë miqësinë mes prifit dhe imamit si dhe idenë e tyre për të shembur murin ndarës.
