Këtë sezon televiziv nisi edicioni i tretë i reality show-t për të rinj, “Për’puthen”.
Njësoj si vitet e tjera, edhe kësaj here formati ishte i njëjtë: Vajzat në fron për të zgjedhur djemtë në takime, ndërsa ndryshimi i vetëm është transmetimi çdo ditë të javës në ekran.
Në fakt, rritja e frekuencës së puntatave të emisionit ka sjellë uljen e interesit dhe kuriozitetit të publikut për personazhet e rinj dhe çiftet që mund të krijohen në këtë reality show.
Duket se as këtë vit, “detyrat e shtëpisë” s’janë bërë siç duhet, megjithëse kishte shumë për të mësuar nga edicioni i kaluar “Për’puthen 2”.
Skandali “Tea-Andi-Beart” u përsërit sërish këtë vit, me personazhet e rinj “Hysen-Alvisa-Bashkim”.
Të lidhur jashtë emisionit, Alvisa dhe Hyseni u përpoqën t’i hedhin hi syve publikut, ndërsa Alvisa në dijeni të produksionit, u rikthye për të “rifituar” Bashkimin.
Rikthimi i saj ishte një pengesë për Efin, e cila zgjodhi Bashkimin për takimin e javës dhe mori një refuzim prej tij. Në lojë futet edhe kësaj here skenari shumë i përfolur, që si gjithmonë pengon rrjedhën e natyrshme të emisionit dhe paracakton “fatin” e konkurrentëve.
Fakti që Alvisa do të rikthehej, e vuri me ‘shpatulla pas murit’ Efin, e cila megjithëse shprehu më herët dëshirën të zgjedhë djem të rinj, u detyrua edhe kësaj here të rizgjedhë në takim Brunon.
Po ashtu, Alvisa u rikthye në emision me “presione”, duke i treguar Brunos se nëse ai do të refuzonte vajzat e tjera, Alvisa do të deklarohej për të.
“Loja” u kuptua qartë nga konkurrentët të cilët me udhëzime të produksionit ose jo, zgjedhin edhe kësaj here të formojnë çiftet e preferuar të publikut, duke fshehur në sfond prapaskena aspak të këndshme.
Edhe sa do të vazhdojë të zhgënjejë ky “reality show”?
