Ekzekutimi i çiftit Boran Bërçana dhe Silvi Ndoci një ditë më parë në Shkodër tronditi mbarë vendin dhe teksa policia po heton për të zbuluar autorët e ngjarjes së rëndë, detaje gjithnjë e më rrënqethëse zbulohen nga uniformat blu.
Siç është raportuar dhe më parë, në makinë me dy të ndjerët ka qenë edhe djali 1 vjeçar i çiftit, i cili është dëshmitari i vetëm në këtë ngjarje. Sipas “Balkanweb”, ekzekutimi ka ndodhur rreth orës 01:15 të mëngjesit të djeshëm, ndërsa policia dhe ambulanca kanë mbërritur në vendngjarje në orën 06:40. Pra për rreth 5 orë e 30 minuta, i vogli ka qëndruar në makinë me dy prindërit e vrarë, deri në mbërritjen e ambulancës. Mësohet se ai është gjetur në krahët e së ëmës, ndërsa ende nuk dihet nëse ka qenë apo jo në sediljen e pasme.
Sipas imazheve të para të siguruara nga “Balkanweb” nga skena e krimit që për arsye etike nuk bëhen publike, Boran Bërçana, ish-efektiv i policisë, ka tentuar të mbrojë me trup partneren dhe të birin, në momentin që autori i krimit ka nisur të qëllojë me armë zjarri drejt tyre. 30-vjeçari ka marrë një plumb në kokë dhe disa në trup, ndërsa partnerja e tij është qëlluar vetëm në trup. Mësohet se autori ka zbrazur 23 plumba në drejtim të makinës, që ishte e parkuar poshtë pallatit ku jetonte çifti me djalin e mitur.
Deri më tani, policia ka shoqëruar 30 persona të cilët do të merren në pyetje në lidhje me ngjarjen, ndërsa janë sekuestruar edhe kamerat e sigurisë ku shihet se autori nuk mban maskë për të mbuluar fytyrën. Pamjet janë dërguar në Tiranë për një ekspertizë më të mirë, pasi identifikimi i autorit është i vështirë për shkak të errësirës.
